Jetisý oblysynda jańa oqý jylyna deıin 4 mektep iske qosylyp, 5 mekteptiń qurylysy bastalady. Al ótken bir jyl ishinde 2290 oryndyq 8 mektep qoldanysqa berilgen. Sol sııaqty 1 shildede Alakól jaǵalaýyndaǵy Aqshı aýylynda «Jalyn» lageri ashylady. Bul týraly búgin Jetisý oblysy ákiminiń OKQ uıymdastyrǵan brıfıngisi barysynda belgili boldy, - dep habarlaıdy Jetisý oblysy ákiminiń baspasóz qyzmeti.
Oblys basshysynyń málimetine súıensek, 2025 jylǵa deıin 21 jańa mektep salynady, onyń ishinde «Jaıly mektep» Ulttyq jobasy sheńberinde 8700 oryndyq 10 mektep turǵyzylady, al 1800 oryndyq 2 mektep qurylysy Alakól aýdany Dostyq aýyly men Panfılov aýdany Jarkent qalasynda bıyl bastalady.
Sol sııaqty jazǵy demalys saýyqtyrýmen oblysta qala syrtyndaǵy lagerlerde, mektep janyndaǵy qosymsha bilim berý uıymdarynda jáne ata-ana men demeýshiler qoldaýymen 103,3 myń bala qamtylady.
- Prezıdenttiń Taldyqorǵan qalasynda iri sheteldik tehnologııalyq ýnıversıtettiń fılıalyn ashý týraly tapsyrmasy jastar úshin aıtýly qýanyshty jańalyq boldy. Qazirgi kezde fılal ashý týraly kelisimshart Hajettep ýnıversıtetine Túrkııa Respýblıkasynyń Joǵary bilim keńesimen kelisý úshin joldandy. Sonymen birge Taldyqorǵanda «Jetisu Digital» IT-haby quryldy. Munda belsendi jastardyń óz ıdeıalaryn naqty bıznes-jobalarǵa engizip, tabys tabýyna múmkindikteri bar, - dedi B.Isabaev.
Jetisý oblysy ákiminiń baspasóz qyzmeti.
