...Árıne, Qazaqstannyń ekinshi prezıdenti Qasym-Jomart Toqaev Elbasyn ulyqtaý jóninde usynys jasaǵanymen, «Qazaqtyń uly tulǵalarynyń esimderin tárk etip, Táýelsizdikti joqqa shyǵaryńdar!» – degen joq qoı.
Solaı bola tura, «shash al dese, bas alýǵa» daıyn turatyn ákimder birshama oblys ortalyqtarynda qazaqtyń uly tulǵalarynyń aty qoıylǵan kósheler men dańǵyldardyń ataýlaryn, Pavlodarda Táýelsizdik dańǵylynyń ataýyn «Nursultan Nazarbaevqa» ózgertip jiberdi!
Nesheme jyldar boıy alysyp júrip, "Kýtýzov" kóshesin "Táýelsizdik" dańǵyly dep qaıta ataýǵa zorǵa qol jetkizip edik! Endi, shynymen, «Táýelsizdikten» aırylǵanymyz ba?!
Bir túsiniksiz jaıt, Astana qalasynyń ataýy ózgeredi de, Pavlodardaǵy ortalyq kóshelerdiń biri Astana kóshesiniń ataýy saqtalynyp qalady... Dál sondaı uzyn ári keń ortalyq kóshelerdiń biri Lermontov báz-baıaǵy qalpynda tur!..
Táýelsizdik dańǵylynyń ataýyn ózgertkenshe Pavlodar qalasyn Nurqala dep qaıta ataý áldeqaıda durys bolar edi! Pavel patshazadanyń esimin qurmetteýden góri Elbasynyń atyn áspetteý meılinshe abzal is qoı!
Bizdiń bul ýájimiz ben usynysymyz Qazaqstan Respýblıkasynyń Prezıdenti Qasym-Jomart Toqaev myrzaǵa jetedi degen úmittemiz.
Arman QANI,
Halyqaralyq «Alash» ádebı syılyǵynyń ıegeri,
Pavlodar qalasynyń qurmetti azamaty.
