Mańǵystaý oblysy Ekonomıkalyq tergep-tekserý departamenti "ÓzenMunaıGaz" AQ bas dırektorynyń orynbasary Baýyrjan Mambetsapaevty laýazymdy ókilettikterin teris paıdalandy degen kúdikpen ustady, - dep habarlaıdy "Adyrna" Mańǵystaý oblysy Ekonomıkalyq tergep-tekserý departamentiniń baspasóz qyzmetine silteme jasap.
Vedomstvo málimetinshe, Baýyrjan Mambetsapaev laýazymdy mártebesin paıdalanyp, jumysqa qabyldaý týraly bekitilgen qaǵıdalardy óreskel buzyp, óziniń birqatar tanysyn "Ózen Munaı Gaz" AQ-na zańsyz kirgizgen. Degenmen kompanııaǵa jumysqa kirý úshin Jańaózen qalasynyń 9 myńnan asa turǵyny kezekke tirkelgen.
"Tanystarynyń jumyssyzdar qatarynda bolmaǵandaryn, tıisti mamandyqqa biliktilikteri sáıkes kelmeıtinin jáne jumysqa múldem kelmegenderin Baýyrjan Mambetsapaevtyń anyq bilgeni tergeýde anyqtaldy.
Baýyrjan Mambetsapaevtyń zańsyz is-áreketteri saldarynan memleketke 46 mıllıon teńgeden asa zalal keltirilip, Jańaózen qalasy turǵyndarynyń kompanııaǵa ornalasýdaǵy quqyqtary óreskel buzylýyna ákep soqqan", - delingen habarlamada.
Tergeýde Baýyrjan Mambetsapaevtyń basqa da zańsyz áreketteri, kompanııanyń, laýazymdy tulǵalardyń jáne merdiger mekemelerdiń bıýdjet qarajattaryn jymqyrý derekteri tekserilip jatyr.
Tergeý jalǵasyp jatyr. Qylmystyq proestik kodekstiń 201-babyna sáıkes ózge de málimetter tergeý múddesine saı jarııalanbaıtyny habarlandy.
