Qazaqstandyq tennısshi Elena Rybakına Rımde ótip jatqan Internazionali BNL d'Italia týrnırinde álemniń birinshi raketkasy Iga Shventekti jeńdi, dep habarlaıdy “Adyrna” ulttyq portaly.
Týrnırdiń ¼ fınalynda otandasymyz polshalyq Iga Shventekke qarsy oıyn ótkizdi.
Matchtyń alǵashqy setinde Shventek 6:2 esebimen basym túsken. Degenmen Rybakına ekinshi setti 7:6 esebimen jeńdi. Al úshinshi sette esep 2:2 bolǵan. Alaıda álemniń birinshi raketkasy jaraqatyna baılanysty oıyndy jalǵastyrýdan bas tartty. Match 2 saǵat 22 mınýtqa sozyldy.
Jeńisine qatysty pikir bildirgen Elena Rybakına matchtyń qıynǵa soqqanyn aıtty.
"Bul matchtan kóp nárse kútpedim. Al ekinshi sette oń jaqtaǵy soqqylardy jaqsy sezinip, jaqsy qozǵala bastaǵanym úshin qýanyshtymyn. Sondyqtan nátıjdege qaramastan jaqsy oınadym dep oılaımyn. Taǵy bir match ótkizetinim úshin qýanyshtymyn", – dedi ol.
Jarystyń júlde qory 3,5 mıllıon eýro. Jeńimpaz 521 myń eýro men 1000 reıtıngtik upaı alady.
Fınalǵa joldama alý úshin Elena Rybakına latvııalyq Elena Ostapenkoǵa qarsy oıyn ótkizedi.
