Oblys ákimi Nurlybek Nálibaev Jalaǵash aýdanyna jumys sapary kezinde temirjol kópiriniń irgetasyn qalaý rásimine qatysty.
Jalpy temirjol ótkeli – jalaǵashtyqtardy kópten beri tolǵandyrǵan máseleniń biri. Aımaq basshysy aýdan turǵyndaryn jańa qurylystyń bastalýymen quttyqtady.
«Memleket basshysy Qasym-Jomart Kemeluly: «Asa mańyzdy máselelerdiń biri – aýyldy keshendi túrde damytý. Aýyldarǵa naqty qoldaý kórsetip, zamanaýı ınfraqurylymdy damytýymyz kerek» – degen bolatyn. Prezıdentimiz ben Úkimettiń Syr óńirin erekshe qoldaýynyń arqasynda aımaǵymyzda aýqymdy jobalar júzege asýda. Kent ortalyǵynan Dáýimbaı eldi mekenine temirjol arqyly ótetin jaıaý júrginshilerge bul másele qıyndyq týǵyzyp kelgen edi. Jalaǵash kentin ekige bólip jatqan temirjoldyń bergi betinde 9 myń, arǵy jaǵynda 6 myńdaı halyq qonystanǵan. Osy tustan poıyz ótkende jaıaý júrginshiler úshin óte qaýipti. Halyqtyń ótkel salý týraly suranysy nazarǵa alyndy. Kent turǵyndarynyń eki jaqqa qatynaýyndaǵy qıyn túıin osylaısha sheshilmek», – dedi Nurlybek Mashbekuly.
Is-shara barysynda aýdandyq ardagerler keńesiniń tóraǵasy Sadyq Álıev jerlesterin jańa ótkeldiń irgetasy qalanýymen quttyqtady.
Aıta keteıik, merdiger «Gúlnur MK» jaýapkershiligi shekteýli seriktestigi qurylys jumystaryn 7 aı ishinde aıaqtaýdy josparlaýda. Quny 328,7 mln. teńge bolatyn kópirdiń uzyndyǵy 55 metrdi quraıdy. Aspaly kópirge qozǵalý múmkindigi shekteýli adamdarǵa arnalǵan shahtalyq lıft ornatylady.
Eske salsaq, aımaq basshysy kúni keshe Aral aýdanynda da temirjol kópiriniń irgetasyn qalaý rásimine qatysty. Oblys ortalyǵyndaǵy Ǵ.Muratbaev jáne Iassaýı kósheleriniń qıylysynda da temirjol arqyly ótetin jaıaý júrginshiler kópiri salynýda. Oǵan qosa «Báıterek» yqsham aýdanynda «Qyzyljarma» kanaly arqyly ótetin kópir qurylysy júrgizilýde.
Ári qaraı aımaq basshysy Jalaǵash kenti M. Shámenov kóshesindegi kúrdeli jóndeý jumystarymen tanysty. Joba quny 359,1 mln. teńge, merdiger mekeme – «Qyzylorda joldary» JShS. Qazirgi tańda kósheniń eski asfalt jabyndysy qyrylyp, tas tóselgen, jaıaý júrginshiler jolynyń bordıýrlary salynýda.
Bıyl Jalaǵash aýdanynyń Myrzabaı ahýn, Eset batyr aýyldarynda dárigerlik ambýlatorııanyń qurylysy bastalmaq. Aýdandaǵy avtomobıl joldarynyń sapasyn jaqsartý úshin 2023 jylǵa 2,2 mlrd. teńge bólindi. «Aýyl – el besigi» baǵdarlamasy sheńberinde jalpy quny 559 mln. teńgeni quraıtyn, uzyndyǵy 9,5 shaqyrym bolatyn 6 kóshe jóndeýden ótkizilýde. Aqsý, M.Shámenov aýyldaryna gaz tartý jumystaryn bastaýǵa 40 mln. teńge qarjy bólinip, memlekettik satyp alý rásimderi júrgizilýde. Jobanyń jalpy quny 1,2 mlrd. teńgeni quraıdy.
