Moldova parlamentiniń tóraǵasy Igor Grosý Gagaýz avtonomııasynyń turǵyndarynyń orys tilinde sóıleıtinine alańdaýshylyq bildirdi, dep habarlaıdy «Adyrna» tilshisi.
«Gagaýzııada atqaratyn jumysymyz kóp, biraz nárseniń ornyn toltyrýymyz tıis. Sonyń biri — tamyryn jaıǵan reseılik úgit-nasıhatpen kúresý. Biz gagaýzdarǵa kómektesýimiz kerek. Olar rýmyn tilin úırenýi úshin aldymyzda arnaıy baǵdarlamalar jasaý mindeti tur. Budan bólek, ózge eldiń tilin emes, óz ana tilin bilýlerine jaǵdaı jasaýymyz qajet»,—dedi ol Vocea Basarabiei arnasyna bergen suqbatynda.
Tóraǵanyń aıtýynsha, tıisti qadamdardy jasaý biraz ýaqytty qajet etedi, biraq múmkin emes eshteńe joq.
Gagaýzııa - Moldavııanyń ońtústigindegi 160 myń adamy bar avtonomııaly aýmaq. Olar — kók oǵyzdardan shyqqan túrki tildes halyq.
Resmı tilderi orys, moldova, gagaýz bolsa da, turǵyndardyń kóbi oryssha sóıleıdi.
