Búgin Astana qalasynyń qylmystyq ister jónindegi mamandandyrylǵan aýdanaralyq soty Ulttyq qaýipsizdik komıtetiniń burynǵy tóraǵasy Kárim Másimovke jáne onyń orynbasarlary A.Sadyqulovqa, D.Erǵojınge, M.Osıpovke qatysty qylmystyq is boıynsha úkimin jarııa etti, dep habarlaıdy "Adyrna" ulttyq portaly.
Is sotta «asa qupııa» qaraldy.
K.Másimov pen A.Sadyqulovqa memleketke opasyzdyq jasaý, bılikti kúshpen basyp alý, bılik pen laýazymdyq ókilettigin asyra paıdalaný, D.Erǵojınge bılikti kúshpen basyp alý, bılik pen laýazymdyq ókilettigin asyra paıdalaný, M.Osıpovke bılik pen laýazymdyq ókilettigin asyra paıdalaný aıyby taǵylǵan.
Sot sheshimi
Kárim Másimov QK-niń 175-babynyń 1-bóligi, 179-babynyń 3-bóligi, 362-babynyń 4-bóligi 3-tarmaǵy boıynsha kináli dep tanyldy, jazany ishinara qosý arqyly 18 jylǵa bas bostandyǵynan aıyrý, múlki tárkilenip, ómir boıy memlekettik qyzmette qyzmet atqarý quqyǵynan aıyrý jazasy taǵaıyndaldy.
A.Sadyqulov QK – niń 175-babynyń 1-bóligi, 179-babynyń 3-bóligi, 362-babynyń 4-bóligi 3-tarmaǵy boıynsha kináli dep tanyldy, jazany ishinara qosý arqyly 16 jylǵa bas bostandyǵynan aıyrý jazasy taǵaıyndaldy, ómir boıy memlekettik qyzmette qyzmet etý quqyǵynan aıyryldy.
D.Erǵojın QK – niń 179-babynyń 3-bóligi, 362-babynyń 4-bóligi 3-tarmaǵy boıynsha kináli dep tanyldy, jazany ishinara qosý arqyly 15 jylǵa bas bostandyǵynan aıyrý jazasy taǵaıyndaldy, ómir boıy memlekettik qyzmette qyzmet etý quqyǵynan aıyryldy. M.Osıpov Qylmystyq kodekstiń 362 – babynyń 3-bóligi boıynsha kináli dep tanyldy jáne oǵan memlekettik qyzmette qyzmet atqarý quqyǵynan aıyra otyryp, 3 jylǵa bas bostandyǵynan aıyrý jazasy taǵaıyndaldy.
K.Másimov, A.Sadyqulov, D.Erǵojın jáne M.Osıpov general ataqtarynan jáne memlekettik nagradalardan aıyryldy.
Memleket kirisine 10 mlrd teńgeden astam qarjy men 24 mln AQSh dollary óndirildi. Úkim zańdy kúshine engen joq.
