Jobanyń negizgi maqsaty – jeke tulǵalar arasynda problemalyq bereshegi bar adamdardyń qarjylyq saýatyn arttyrý. Oqý bıyl 2 mamyrda bastalyp jyl sońyna deıin jalǵasady.
Qarjylyq saýattylyq deńgeıin arttyrý boıynsha tegin kýrs «AMANAT» partııasynyń aýdandyq fılıaldarynda tómendegi talaptar boıynsha ótedi:
- bir toptyń oqý merzimi – 5 kún
- bir toptaǵy qatysýshylardyń sany – 30-50 adam
- bir aıda oqıtyn toptardyń sany – 3
Oqý baǵdarlamasy kelesi sanattaǵy azamattarǵa arnalǵan. Olar nesıe boıynsha qaryzdary bar jáne boryshkerler tizimindegi adamdar, dál qazirgi ýaqytta nesıesi bar, biraq merzimi ótip ketken bereshekteri joq adamdar jáne nesıe alyp, memlekettik baǵdarlamalar boıynsha qarjylandyrylatyn isin jańa bastaǵan kásipkerler.
Joba aıasynda aýyldyq eldi mekenderdiń 80 myńǵa jýyq turǵynyn qamtý josparlanýda.
Jobaǵa qatysýshylar óz qarjysyn tıimdi basqarýdy jáne shyǵyndaryn ońtaılandyrýdy úırenedi. Olar qarjylyq máselelerdiń qalaı týyndaıtynyn, nesıelik qaryzdar sanyn azaıtýdyń joldaryn, alaıaqtyq áreketterdi qalaı anyqtaýǵa bolatynyn úırenedi. Al isin jańadan bastaǵan kásipkerler kompanııa bıýdjetin qalyptastyrý tártibi, salyq esep-qısabyn usynýdy jáne memlekettik qoldaý baǵdarlamalary boıynsha qarjylandyrý sharttary týraly qundy aqparat alady.
«Qaryzsyz qoǵam» jobasynyń alǵashqy kezeńinde elimizdiń 8 óńiri qamtylady. Olar: Aqtóbe, Almaty, Túrkistan, Soltústik Qazaqstan, Batys Qazaqstan, Jambyl, Atyraý jáne Mańǵystaý oblystary.
Jobaǵa qatysý sharttary týraly tolyq aqparat jaqyn arada jarııalanady.
