Blıten eki dúrkin álem chempıony Bıbisara Asaýbaeva Jansaıa Ábdimálikke qatysty synı pikir aıtty. Bul týraly ol Instagram áleýmettik jelisindegi paraqshasynda jazdy, dep habarlaıdy “Adyrna” ulttyq portaly.
«Shahmat – bul, árıne, jekeleı sport túri. Biraq jeke óziń bolý men pikirles bolý – ár basqa nárse.
«Árkim ózi úshin» degen túsinikti keıbireýler «bárine túkirgenim qandaı» degen maǵynada kórgisi keledi. Olardan óz qatesin túsinip, sypaıylyqpen keshirim suraýdy eshqashan kútpeısiń. Eger mundaı adamdar aınalasyna ótirikti jaýdyrsa, sypaıylyq týraly áńgime aıtý qıyn. Sirá, shyndyqty búrkemeleý – birinshi kezekte shahmatshy ekendigin umytqan Almaty máslıhatynyń burynǵy depýtaty Jansaıa Ábdimáliktiń kásibı qasıeti. Alaıda kez kelgen kásibı sportshy úshin keshirilmeıtin nárseler bar. Ol tipti kim bolsa da», dep jazdy Asaýbaeva.
Onyń aıtýynsha, Jansaıamen birge ózin qosqanda, taǵy on bir shahmatshy Delıde mańyzdy Gran-prı týrnırine kelgen. Biraq Jansaıa uıymdastyrýshylar durys qarsy almady degen jeleýmen jarystan aıaqasty ketip qalýdy jón kórgen. Muny týrnırdiń ashylýyna bir saǵat qalǵanda, áriptesine telefon arqyly habarlap, áýejaıda ekendigin, ushqaly otyrǵanyn jetkizgen.
«Al ózi biz shuǵyl jınalys jasap, ne isterimizdi bilmeı jatqan kezde otelde qydyryp júrgen. Jansaıa ózinen bir eli qalmaı, birge júrgen er adammen ushyp kelgen. Basqalar jalǵyz bolsa da, otelge eshqandaı qınalyssyz jetken. Keıbir shahmatshylar Gran-prıge qatysý úshin ózge jarystardan bas tartqan, endi olar yńǵaısyz jaǵdaıda qaldy. Ótirik aralasqan asyǵys sheshimniń saldarynan týrnır bolmaı qalýy múmkin. Sońǵy sátte ózi oılap tapqan sebepten bárin tas-talqan qylǵysy kelgen bir adamnyń kesirinen osylaı bolyp otyr. Árıne, jergilikti uıymdastyrýshylarǵa qatysty suraq kóp. Biraq kóp másele Jansaıaǵa, onyń sportshyǵa tán emes áreketine qatysty. Aıaq astynan emoııaǵa jol bergendigine, áriptesterine, tutastaı alǵanda, ómirge degen kózqarasyna, kásibıligine qatysty. Sportshylar kez kelgen kútpegen jaǵdaıǵa berile salmaı, bárine daıyn bolýy tıis. Kez kelgen usaq-túıekke Jansaıa sekildi qarasaq, onda sportpen qosh aıtysyp, kúıeýge shyǵyp, as daıyndaý kerek...», - dedi Bıbisara.
