Aqtóbe oblysy, Qobda aýdany, Baıtaq jáne Jaryq aýyldary sý tasqyny saldarynan jaryqsyz otyr. Aýylda áli elektr shamy janǵan joq. Sondaı-aq sý astynda qalǵan birqatar úıler bar, dep habarlaıdy "Adyrna" ulttyq portaly QazAqparat-qa silteme kórsete otyryp.
Aqtóbe oblysy Qobda aýdanynda tótenshe jaǵdaı jarııalanyp, qazirgi kezde shyǵyndar eseptilip jatyr.
Jaǵdaımen tanysyp, turǵyndarmen kezdesken QR TJM Iýrıı Ilın jan-jaqty kómek kórsetiletinine ýáde berdi.
Sońǵy málimetterge súıensek, áli de 17 úı sý astynda.
«Barlyǵy 3 úı qulady. Áli kúnge deıin 17-i sý astynda tur. Taǵy 4 úı ishinara qulaǵan. Jalpy 79 úıge, 22 úıdiń aýlaǵa sý kirdi. Sý ketpeı, sý soryn aıaqtamaı naqty aqparat aıtý qıyn. Bul úılerde 316 adam turady. Onyń 107-i balalar. Mektep jasyndaǵy 64 bala «Kúnshýaq» lagerinde demalady», - dedi Qobda aýdany ákiminiń orynbasary Arman Qabylov.
Qobda aýylyndaǵy Baı taq jáne Jaryq aýyldarynda jaryq joq. Baıtaq aýylynda 23, al Jaryq aýylynda 82 úı bar.
«Biz qoldan kelgenshe jumysty jedeldetýge kúsh salamyz. Biraq sý aǵysy qatty. Qazir jel de kúsheıip tur. Jaryq aýylyna jaryq berý úshin arnaıy brıgada kúndiz-túni jumys istep jatyr. Bul jumys erteń de jalǵasady. Baıtaq aýylyna jol joq. Qulaǵyn baǵanalardy qaıta turǵyzýǵa tehnıka bara almaǵan soń dızeldi generator taýyp qoıdyq. Jaryqta jaryq 19-naýryz kúni saǵat 08:30-da sóndi. Al Baıtaqta elektr togy 13-naýryz kúni úzildi»,- dedi Qobda elektrmen jabdyqtaý basshysy Jumamurat Jubatqan.
Eske salsaq, Qobda aýylyna 24 úı salynady. Sý tasqyny zardap shekken 75 otbasyna 500 myń teńgeden berilgen.
"Adyrna" ulttyq portaly
