«Jasyratyny joq, Sáýle (Ábildahanqyzy – red.) men Saıragúldiń jaǵdaıynda men tolyq Sáýleniń jaǵyndaǵy adammyn. Óıtkeni, Sáýleniń eńbegine, yntasyna kýámin. Eń bastysy, adamda kóńil degen bolady ǵoı. Ony jaqsy bilemin. Sol úshin kezinde Saıragúlge «munyń adamgershilikke jatpaıdy» dep renishimdi aıtqan edim. Ári ózine tikeleı «sen meniń advokattaǵymnan óziń bas tartpasań, men seni osńyna deıin qorǵaımyn» dep aıtqanmyn. Biraq qatty renjigenimdi jasyrmadym. Soǵan baılanysty bolar dep oılaımyn, bilmeımin.
"Ózi maǵan ókpem joq",- deıdi. "Bastapqy kezderde telefon kótermediń" dep renjidi. Sol kezde men Saıragúlge: «Kóz aldyńa elestet, qyzyń Úkiliaı o dúnıelik bolsa, eshteńe bolmaǵandaı jumys istep, telefonmen sóılesip otyra alasyń ba?» dedim. Al men Saıragúldiń bir de bir sotyna, bir de bir jınalysyna barmaı qalmaq túgili, keshigip kórgen adam emespin. Bárin ýaqytyly úılestirip júrdim. Al qańtardyń 4 kúni respýblıkalyq kóshi-qon komıtetinen qanaǵattandyrmaý týraly jaýap aldym, "sotqa shaǵym jazamyn" dedim. Aýyr qazaǵa tap bolǵanyma qaramastan Saıragúldiń máselesi jóninde talap-aryz jazyp, sotqa tirkettim. Sol kezde ol halyqqa vıdeo málimdeme jasaıdy. Aıtqany – Abzal Quspan men habarlasqanda kótermedi. Árıne, ashýlandym. Talap-aryzymdy ákeldim sotqa. Sonda Saıragúl keshirim surap, qaıtadan meniń qorǵaýymdy ótindi. Kelistim. Negizi, qatty renjigenmin.
15 aqpan sot bolýy tıis. Endi qazaq degen kóńili ashyq qoı, aýyr qazaǵa dýshar bolsań, kóńil shaıǵa shaqyrady. Sóıtip 12 aqpan kóńil shaıǵa baryp, dastarhan basynda otyrsam, Saıragúl habarlasty. Tutqany kóterip, keıin habarlasatynymdy, qolymnyń bos emestigin aıttym. Ol sot týraly surastyryp, habarlama jazyp jiberipti. Men 15 aqpan bolatynyn aıttym. Sóıtsem, "sot bolyp ketipti" deıdi, al onda ekeýmiz de bolmadyq. Buǵan alańdaǵan men sot bóliminiń hatshysyna habarlasyp edim, ol «eshqandaı ózgeris joq, sot 15 aqpan bolady» dedi. Al men 14 aqpanǵa bılet alyp qoıǵan edim. Al ol taǵy vıdeo jarııalap qoıypty. Taǵy renjidim. Keshe túski ýaqytqa deıin Saıragúlmen telefon arqyly sóılesip júrdim, oıymda eshteńe joq. Keshe Oraldan ushaqqa otyryp, Astanaǵa ushyp bardym, Astanadan tańǵy saǵat 4-te Almatyǵa ushyp keldim. Almatyǵa kelip, álgi vıdeony kórdim.
Bul – balanyń oıyny ma, álde kúrdeli oıyndar júrip jatyr ma, bilmedim. Meniń biletinim, men ashyq aýyz, ańqaý advokat ekenmin.
Amal joq, 3000 shaqyrym jerdi artqa tastap kelgen soń, Taldyqorǵanǵa bardym. Bardym da kózine qarap bárin aıttym. Maǵan talaby bar ma, aıtary bar ma, bárin suradym. «Joq» deıdi. Ashýlanamyn, árıne.
Sóıtip, Aıman Omarovaǵa sáttilik tiledim de, qaıtyp baramyn. Bul isti osymen támamdadym. Men oıynshyq emespin ǵoı», - dedi Abzal Quspan Qamshy.kz aqparat agenttiginiń tilshisine.
"Qamshy.kz "
