Memleket basshysy Qasym-Jomart Toqaev Qazaqstan áıelderin 8 naýryz – Halyqaralyq áıelder kúnimen quttyqtady. Bul týraly Aqorda jarııalady, dep habarlaıdy “Adyrna” ulttyq portaly.
“Qymbatty hanymdar!
Barshańyzdy Halyqaralyq áıelder kúnimen shyn júrekten quttyqtaımyn!
Sizder álemge jylýlyq pen jarasym syılap, jaqyn jandaryńyzdy mahabbatqa bóleısizder. Aıaýly analarymyz óskeleń urpaqtyń boıyna adamgershilik qundylyqtardy sińirip, olardy eńbekqor, bilimpaz bolýǵa tárbıeleıdi.
Búginde áıelder qaýymynyń otbasyndaǵy, qoǵam ómirindegi jáne memleketti jan-jaqty damytý isindegi róli orasan zor.
Qyz-kelinshekter óndiriste, shyǵarmashylyq jolynda, saıasat, bıznes jáne basqa da kóptegen salada bıik belesterdi baǵyndyryp keledi.
Memleket genderlik teńdikti saqtaýǵa, áıelder quqyǵyn qorǵaýǵa jáne otbasy qundylyqtaryn nyǵaıtýǵa árdaıym basa mán beredi.
Analarymyz ben arýlarymyzdyń alańsyz ómiri – ultymyzdyń jarqyn bolashaǵynyń kepili.
Sizderge zor densaýlyq, baq-bereke tileımin!
Árdaıym kóktem kúnindeı jadyrap júrińizder!” – delingen Prezıdent quttyqtaýynda.
Sondaı-aq, Prezıdent áıelder qaýymyn 8 naýryz merekesimen quttyqtap, ultymyzdyń dúnıetanymynda áıeldiń orny erekshe ekenin atap ótti. Sondaı-aq Memleket basshysy sulýlyq pen náziktik, meıirim men shapaǵat – bári de áıelderden bastaý alatynyn jetkizdi.
«Shyn máninde, árbir adam úshin anadan uly, anadan qymbat eshkim joq. Eń qasterli qundylyqtarymyz «Jer-ana», «Otan-ana» uǵymdarymen tyǵyz baılanysty. «Ata uldy, ana ultty tárbıeleıdi» deıdi. Bul sózdiń aıryqsha mán-mańyzy bar. Ult bolashaǵy urpaq tárbıesinen bastalady. Ár balanyń jetistigi – ana mahabbatynyń jemisi. Uly Abaı aıtqan «Tolyq adamǵa» tán asyl qasıetter urpaqtyń boıyna ana arqyly darıdy», – dedi Prezıdent.
