"Júrekten qozǵaıyn,
Ádepten ozbaıyn."
Abaı
Men úshin Abaı - úlken tulǵa. Onyń bizge qaldyrǵan murasy - taýsylmas qazyna. Árıne, men Abaı shyǵarmalarynyń bárimen tanysyp úlgergen joqpyn. Bálkim, Abaı álemine saıahat jasap shyǵý úshin, búkil ǵumyryńdy arnaý kerek shyǵar. Eń alǵash ret Abaıdyń óleńin 7 synypta jattaǵan bolatynmyn. Abaı óleńderi unaǵany sonshalyqty, ári qaraı kelesi óleńderin jattaýǵa kiristim. Sóıtip, 7 synyptan bastap " Abaı oqýlaryna" qatysa bastadym. Árıne, Abaı óleńderin naqyshyna keltirip aıtatyn júırikterdiń arasynda jasqanǵanym ras. Sebebi, Abaıdyń elýden astam óleńin biletin balalar boldy, al meniń biletinim ol kezde nebiri 3 óleń ǵana bolatyn. Sol kezde meniń qasyma muǵalimim kelip: " Eń bastysy - sany emes, sapasy" dep maǵan basý aıtty. Sodan soń men sahnaǵa shyǵyp, bar jan - tánimmen, júrek tebirenisimmen ózim biletin Abaı óleńderin aıtyp berdim. Osylaısha meniń Abaı álemindegi tuńǵysh qadamym bastaldy. Baıqaýda men 3 - dárejeli dıplomǵa ıe boldym. Biraq, ol meni toqtatpady, sebebi ol da jeńis, men óz - ózimdi jeńdim, ózime ózimdi dáleldedim. Sóıtip 8 synypta taǵy da qatysyp, taǵy da 3 - oryn aldym.
«Seńbe jurtqa, tursa da qansha maqtap,
Áýre etedi ishine qýlyq saqtap.
Ózińe sen, ózińdi alyp shyǵar
Eńbegiń men aqylyń eki jaqtap»
- degen jyr shýmaqtary, eń alǵash Abaı oqýlarynda jatqa aıtqan óleńim bolatyn. Osy bir óleń, sol kezdegi meniń ishki sezimimdi beınelep turǵandaı áser qaldyrdy. Árdaıym sol óleńdi esime túsirip, ózime bir qýat alamyn. Sóıtip kelesi jyly «Birinshi oryn alamyn!» degen maqsatpen bardym.. Menimen birge, meniń qazaq tili jáne ádebıet páninen beretin muǵalimi Laýra Nýrlanqyzy bardy. Meniń ustazyma degen alǵysym sheksiz, óıtkeni, ol kisi meni Abaı álemimen tanystyryp, Abaı shyǵarmashylyǵyna tereń boılaýǵa talpyndyrdy, "Abaıtaný" degen úlken, uly iske umtyldyrdy. Orys synybynda oqysam da meni qazaq tili jáne ádebıet pánderinen olımpıadalarǵa qatystyrdy. Tipti, meni jetektep, qol jetpes bıik shyńǵa uqsaǵan, ekiniń biriniń rýhy jete bermeıtin, " Abaı oqýlary " syndy júzden júırik, myńnan tulpar talaptylar baq synasatyn báıgege de alyp bardy. Bul - ustaz úshin de, oqýshy úshin de úlken jaýapkershilik. Sol jaýapkershilikti ustaz ekeýmiz birge kóterdik. Osylaı, kelesi jyly, aýdandyq " Abaı oqýlaryna " qatysyp bas júlde ıegeri bolyp, mekteptiń namysyn qorǵaý úshin qalaǵlyq baıqaýǵa joldama aldym. Men qatty qýandym, óıtkeni, ol meniń ǵana emes, maǵan úmit artyp, sengen ustazymnyń da jeńisi edi.
Abaıdyń árbir týyndysynda tereń maǵyna jatyr. Danyshpan aqyn barlyq ýaqyttyn ótkenniń de, búginginiń de, bolashaqtyń da kez-kelgen máselesin aqyl- aıasyna sıǵyza bilgen. Abaıdyń keıbir óleńderinen men ózimdi tapqandaı boldym. Abaı óleńderiniń árbir sózi, árbir joly ,árbir shumaǵy meniń dúnıetanymyma , ómirdi túsinýime ózek boldy. Abaı óleńderin oqyǵan saıyn, Abaı álemine birtindep enip bara jatqanymdy jan dúnıemmen sezinemin. Abaıdy qaıtadan oqyǵan saıyn, onyń árbir sózin, árbir shumaǵyn qaıtadan jańa qyrynan, ózgeshe bir maǵynada túsinip, burynǵydan da tereń oı túıgendeı bolamyn. Jáne bir ǵajaby, sonaý uly Abaı ómir súrgen kezeńge bir sát sapar shegip qaıtqandaı kúı keshemin.
Meniń oıymsha, uly Abaıdy tek qazaq qana bilý tıis emes,ony búkil álem, búkil halyq, bara adamzat bilýi kerek.
Aıret Janel
Almaty qalasyndaǵy 157 - mekteptiń 11 – «v» synyp oqýshysy
