Aqtöbedegı äskeri bölımde qatarlasynyŋ jaǧyn syndyrǧan jauyngerge qatysty qylmystyq ıs qozǧaldy. 18 jastaǧy sarbazdy öŋırdegı äskeri garnizonnyŋ tärtıp saqşylary tergep jatyr, dep habarlaidy «Adyrna» tılşısı «KTK»-ǧa sılteme jasap.
Jäbırlenuşı men ony soqqyǧa jyqqan jıgıt Aqtöbedegı artilleriia jäne raketa bölımınde Otan aldyndaǧy boryşyn öteude. Jyl basynda Aqtaudaǧy bölımnen osynda auystyrylypty. Kezekşılıkte jürgen jauyngerdı qatarlasy alǧaşqyda tüiıp ötıp, keiın bölek bölmege aparyp aiausyz soqqyǧa jyǧady. Basynan jaraqat alyp jaǧy synǧan sarbazǧa äskeri bölım basşylary der kezde kömek bermeptı. Tek esınen tanǧan kezde ǧana gospitalge emes, oblystyq auruhanaǧa jetkızgen. Onymen qoimai, därıgerler tärtıp saqşylaryn şaqyrǧanda äskeri bölım basşylarynyŋ bırı älsırep jatqan sarbazdy kerı alyp ketpek bolady. Qazır äskerdegı älımjettıktı jasyrmaq bolǧandarǧa qatysty tergeu jürıp jatyr. Komandirlerge qandai şara qoldanylatyny belgısız. Öitkenı äzırge tek qatarlasyn ūrǧan jauyngerge ıs qozǧaldy.
«Osy oqiǧaǧa qatysty qylmystyq ıs qozǧaldy. Äskeri polisiia tergep jatyr. Jaraqat alǧan jauynger Almaty qalasyndaǧy gospitalde emdelıp jatyr. Onyŋ sol jaǧy synyp, därıgeler operasiia jasaǧan. Qazır jaǧdaiy tūraqty. Onyŋ äskeri boryşyn ötep, üiıne qaituyna älı segız ai bar»,—dedı 30238 äskeri bölımı komandirınıŋ orynbasary Rinat Şärıpov.
Ūqsas jaŋalyqtar
