"Adyrna" portalynyń redakııasyna Túrkistan qalasynyń turǵyndary habarlasty. Eńiregende etegi jasqa tolǵan turǵyndardyń aıtýynsha olardy jergilikti bılik kúshtep, májbúrlep kóshirmek. Jergilikti bılik memlekettiń usynǵan aqshasynan bas tartqandardy kúshtep kóshirýge kóshken. Olardyń bergen aqshasyna qazir Túrkistannan úı ala almaımyz deıdi.
Ózin Gúlzııa dep tanystyrǵan turǵyn "meniń úıimdi 13 mıllıon teńgege baǵalap otyr. Meniń úıim Qoja Ahmet kesenesiniń týra aldynda. Ol aqshaǵa men úı ala almaımyn ǵoı. Túrkistan oblys ortalyǵy bolǵaly úılerdiń baǵalary eki esege kóterilip ketti. Úı alaıyn dep izdep edim, 24-25 mıllıon surap otyr. Meniń kórshim 8 mıllıon teńgege úıin Úkimetke satty. Qalanyń shetinen 13 mıllıonǵa úı satyp aldy. Úılerin satyp jatqandardyń kóbi memlekettik qyzmetkerler. Olardy jumys orny arqyly qorqytyp, kóshirýde. Halyqpen sanaspaıtyn ne degen memleket bul"- dep telefonnan jylap jiberdi. Ol kisiniń aıtýynsha, satylǵan úılerdi úkimet emes, ákim-qaralar men bıznesmender satyp alýda deıdi. "Estip jatyrmyz. Ol úılerdi satyp alyp jatqan aqshasy bar sheneýnikter men bıznesmender eken. Ózderiniń bolashaq bıznesi úshin" deıdi ashynǵan ana.
Móldir esimdi shahar turǵyny bılikten kóńili qalǵanyn, kómekti jýrnalıster men qoǵamnan ǵana kútip otyrǵanyn aıtty. Onyń aıtýynsha, sol kúni anasy jumysta bolǵan úıde eki inisi ǵana bolypty. "Biz eshqandaı qujatqa qol qoıǵan joqpyz. Kerek deseńiz esep-shotymyzǵa aqsha da túspegen. Al, olar kelgen de úıdi buzyp tastaǵan. Aldymen saraıdyń ishindegi zattardy dalaǵa shyǵaryp, sosyn saraıdy qulatqan. Úıde uıyqtap jatqan eki inim dalaǵa atyp shyqsa, saraıdy qulatyp tastap, Úıdiń shatyrlaryn buzýǵa kirisipti. Men bólek turamyn. Turmystamyn. Kishkentaı balam baryna qaramastan ushyp jettim. Anam da kelgen eken. Sol jerde prıstýp alyp, qulady. Jedel-járdem anamnyń ekinshi ret prıstýp alǵanyn dáleldeıtin anyqtama berdi. Sóıtip, aýrý anam eki baýyrymmen dalada qaldy. Qazir men úıime alyp keldim. Anam sóıleı almaı otyr. Úlken inimdi sol jerde júrgen ıatqaminerler qorqytypty. Kórshilerim kórip qalyp, arashalap alypty. Biz prokýratýraǵa aryzdandyq. Biraq, bizdiń aryzymyzdy kim tyńdasyn. Kómektesińizdershi ótinish" dep jylap otyrǵan jas anaǵa ne aıtarymyzdy bilmedik.
Móldirdiń anasyna jedel-járdemniń bergen anyqtamasy.
Ákimdik ne deıdi?
Al, biz osy is boıynsha suraý saldyrǵan Túrkistan oblysynyń baspasóz qyzmeti bizge mynandaı aqparat usyndy.
Túrkistan qalasyn kórkeıtý jáne kesene mańynan «Rýhanı-mádenı ortalyq» aımaǵyn keńeıtýge qajetti jerdi daıyndaý maqsatynda memleket muqtajdyǵy úshin 168 (14 kásipkerlik, 154 turǵyn úı) nysan memleketke qaıtarylady.
Osy 168 nysannyń baǵalaý jumystary 2 025 545 172 teńgeni quraǵan. Atalǵan nysandardyń 95 menshik ıesi kelisim berip, olarǵa 1 139 756 000 teńge tólenedi. 44 nysannyń menshik ıeleri kelisim berýden bas tartýyna baılanysty sotqa talap-aryz joldanýda. Qalǵan 29 nysannyń ıelerimen kelissóz júrip jatyr. Baǵalaý jumystaryn memlekettik satyp alý zańyna sáıkes, «Ekspo Oenka» JShS júrgizdi.
Baǵalaý somasyna kelispegen turǵyndardyń narazylyq bildirýine baılanysty oblys ákimi azamattardy qabyldap, tıisti túsindirý jumystaryn júrgizdi.
Buǵan deıin qala basshysy osy jaıtqa qatysty birneshe ret turǵyndarmen kezdesken bolatyn. Qazirgi tańda 29 adamnan qurylǵan arnaıy shtab menshik ıelerimen jumys jasaýda.
Jumys tobynyń nátıjesinde ústimizdegi jyldyń 28 qańtaryna deıin 95 menshik ıesiniń kelisimi tolyǵymen alynǵan. Bul kelisimi alynǵandardyń ishinen 41 menshik ıesine memleketten 471 mln. teńge qarjy tólenip, onyń ishinde búgingi kúnge deıin 28-nysan buzyldy.
Buzý jumystaryna ákimdik tarapynan kómek toby qurylyp, arnaıy tehnıkalar men jumysshy toby qurylys materıaldaryn turǵyndardyń qalaǵan meken-jaılarǵa jetkizip berýde.
Sonymen qatar, jer telimderi men jyljymaıtyn múlik ıeleriniń arasynda túsindirme jumysyn júrgizý úshin jáne olardy turǵyn úı-jaılarmen qamtamasyz etý joldaryn qarastyrý úshin arnaıy 14 jumysshy top qurylǵan. Osy toptyń jumys nátıjesinde qaladaǵy 500-ge tarta satylatyn jeke úıler anyqtalyp, menshik ıelerine usynystar jasalyp otyr. Qala boıynsha satylatyn úılerdiń 90 paıyzy 10-20 mln. teńge aralyǵynda.
Túrkistan qalasynda jerdiń ár sottyǵynyń kadastrlyq quny 88 myń teńge bolsa, turǵyndarǵa naryq baǵamy boıynsha 515 myń teńge berilip otyr. Sondaı-aq, turǵyn úıdiń qurylys materıaldarynyń túrine, sapasyna (kirpish, qysh, shlakoblok, shıfer, irgetasy t.b.) qaraı árbir sharshy metrine bergen 55 pen 90 myń teńge aralyǵyndaǵy baǵasyna kelispeı otyrǵan 44 menshik ıesi bar. Olarǵa qala ákimdigi jáne prokýratýrasynyń mamandarymen kezdesý ótkizip, memlekettiń usynǵan qarjysyna kelispegen jaǵdaıda jeke baǵalaýshy jaldaı alatyndyǵy jáne sheshimin sotqa usynýǵa quqyly ekenindigi túsindirildi. Tipti keıbir turǵyndar tarapynan úı qujattarynda oryn alǵan qatelikterdi qaıta rásimdeýge ákimdik tarapynan zań talaptaryna sáıkes keńester berilip, qoldaý kórsetilýde.
Túrkistan oblysy ákiminiń baspasóz qyzmeti
P.S. Túrkistandyq turǵyndar qalamyz oblys ortalyǵy boldy degende qýanyp edik. Dál osylaı baspanasyz, dalada zarlap qalamyz dep oılamadyq deıdi. Shetten kóship kelgen qandas aǵamyz "Biz Úkimetke, Nazarbaevqa senip keldik qoı. Dalada qaldyq. Halqym-aý aıdyń-kúnniń amanynda Otanymyzǵa kelip qańǵyp qaldyq qoı. Endi qaıda baramyz" dep, azamat basymen eńkildep otyr.
Biz Túrkistan oblysy ákimdiginen osy oqıǵaǵa qatysty aqparattyń anyq-qanyǵyn kútemiz. "Adyrna" ulttyq portaly osy másekleni nazarda ustaıtyn bolady.
Ońǵar Qabden
"Adyrna" ulttyq portaly
