Qazaqstandyq dzıýdoshy Áıgerim Ábilqadirova Parıjde ótip jatqan "Úlken dýlyǵa" týrnıri kezinde qarsylasyn nege tistep alǵanyn aıtty. Bul týraly ol Instagram jelisinde aıtty, dep habarlaıdy “Adyrna” ulttyq portaly.
Qazaqstandyq qyz 52 kelige deıingi salmaq dárejesinde týrnırdiń alǵashqy kezdesýinde belgııalyq Sharlın van Snıkke ese jibergenimen, qarsylasyn tistep alǵan.
"Synap jatqandarǵa jaýap bergim keledi. Keshe men Parıjdegi "Úlken dýlyǵa" týrnırinde belgııalyq sportshymen jekpe-jekke shyqtym. Ol shyntaqty aýyrtý tásiline kóshti. Men berilýge belgi berdim, biraq soǵan qaramastan belgııalyq sportshy qolymdy syndyrýdy jalǵastyrdy.
Shyntaǵymnyń syrt etkenin estigennen keıin, men ony avtomat túrde tistep aldym, basqa amalym bolmady. Osynyń bárine qosa, tóreshi múlde jaýap qatpaı, jekpe-jekti toqtatpady.
Aıtpaqshy, maǵan jaǵymsyz sózder jazyp jatqan erkekter... Eger sondaı batyr bolsańyz, maǵan óz nómirlerińizdi jazyp, oıyńyzdaǵyny betime aıtyp kórińiz, eger batyl bolsańyz, árıne", - dedi sportshy.
