Aqmola oblysynyń Óńirlik kommýnıkaııalar qyzmetinde ótken brıfıngte Egindikól aýdanynyń ákimi Erlan Isabekov aýdannyń 2018 jylǵy qorytyndysy men bıylǵy josparlary týraly aıta kele, aǵylshyn tilinen sabaq berip júrgenin atap ótti dep habarlaıdy QazAqparat.
"Bolashaq" baǵdarlamasynyń stependıaty aǵylshyn tilinen sabaq bergenine tańdanýdyń qajeti joq ekenin aıtyp ótti.
"Elimizde sabaq berip júrgen alǵashqy ákim men emes. Degenmen bul ıdeıany júzege asyrý aldynda biraz oılanyp, tarazyladym. Iaǵnı, adamdar qalaı túsinedi? Bálkim, bireýlerge unamaı qalýy da múmkin. Halyq aýdannyń áleýmettik-ekonomıkalyq damý kórsetkishterin jaqsartýmen nege aınalyspaıdy degen oılar mazalady", - dedi Erlan Isabekov.
Ákim jumystan bos ýaqytta nemese demalys kúnderi sabaq beredi eken.
Alǵashynda jurt muǵalim ákimniń jańa "qyzmetine" oǵash qarasa, qazir buǵan úırenip ketken.
Tipti, ákimniń sabaǵyna qatysatyn adamdardyń sany artqan.
Erlan Isabekov turǵyndarǵa aǵylshyn tilinen sabaq berip qana qoımaı, turmystyq, áleýmettik máselelerdi de sheshýge atsalysady.
