Mańǵystaý oblysynda 7 jyl boıy bala súıe almaǵan áıel birden úshemdi dúnıege ákeldi, dep habarlaıdy «Adyrna» tilshisi KTK telearnasyna silteme jasap.
Jas ana jeti jyl boıy bala kótere almaǵan. Sóıtip «Ańsaǵan sábı» memlekettik baǵdarlamasyna júginipti. Endi, mine, birden, Iasmına, Alına, Adına esimdi úsh qyzdyń anasy atandy. Dárigerler bóbekterdiń jaǵdaıy birqalypty ári turaqty deıdi. Jalpy egizder men úshemder dúnıege keletin óńirlerdiń ishinde Mańǵystaý oblysy kósh bastaıdy. Byltyr munaıly ólkede eki úshem men 177 egiz dúnıege kelgen.
«Nárestelerdiń kúni jetilmegen. Biraq dárigerlerdiń baqylaýynyń arqasynda balalardyń da, anasynyń da jaǵdaıy jaqsy. Jaqyn arada úıine shyǵarý josparlanyp otyr. Osy qańtar aıynda 600-den asa bala dúnıege keldi. Onyń ishinde – 10 egiz»,—deıdi Mańǵystaý oblystyq «Ana men bala» perınataldy ortalyqtyń dırektorynyń orynbasary Aqsholpan Asýbaıqyzy.
