Memleket basşysy şahmattan älem chempionatynda tabysty öner körsetken Dinara Säduaqasovany qūttyqtady. Būl turaly Aqordanyŋ baspasöz qyzmetı habarlady, dep jazady "Adyrna" ūlttyq portaly.
Prezident Qasym-Jomart Toqaev Almatyda ötıp jatqan şahmattan älem chempionatynda rapid boiynşa kümıs medal ielengen Dinara Säduaqasovany qūttyqtady.
Memleket basşysy Qazaqstan şahmatşylarynyŋ älem chempionatyndaǧy jetıstıkterı elımız üşın ülken maqtanyş ekenın atap öttı. Onyŋ aituynşa, sportşylarymyzdyŋ halyqaralyq turnirlerdegı ärbır jeŋısı osy sport türımen ainalysatyn jastardy qanattandyrady jäne būl Qazaqstan şahmat mektebınıŋ deŋgeiı joǧary ekenın körsetedı.
Prezident daryndy şahmatşyǧa talmai eŋbek etıp, jeŋısten jeŋıske jete beruıne tılektestık bıldırdı.
Sonymen qatar Memleket basşysy Almatyda ötıp jatqan osy älemdık saiysta joǧary nätije körsetken Jansaia Äbdımälıkke de ızgı tılegın joldady.
"Adyrna" ūlttyq portaly
