Keshe Mońǵolstan astanasy Ulan-Batyrda turǵyndar sherýge shyǵyp, Úkimet úıine basa-kóktep kirdi. Bolǵan oqıǵaǵa qatysty túrli joramaldar aıtylyp jatyr. Mońǵol tiline jetik ári ol jaqtaǵy saıası úrdisterden habary bar azamat Nurbol Qanaǵatuly bolǵan jaıttyń jaı-japsarynan sóz etti. Naqty derekter týrasynda "Adyrna" ulttyq portaly baıandaıdy.
Avtordyń ańdaýynsha, eldegi ereýilge kómir urlyǵy men "mesqaryn depýtattardyń" jemqorlyǵy muryndyq bolǵan.
- "Mońǵolııadaǵy ereýil ne bolyp jatyr?" - dep keı BAQ ókilderi surap jatyr. Áli ólińkiremegen mońǵolshammen ol jaqty bir sholyp shyqtym. Qytaıdyń Syrtqy ister mınıstrligi kómir urlyǵy boıynsha tekseris júrgizý úshin Mońǵol úkimetine kómektesýge daıyn ekenin málimdedi. Keı málimetter boıynsha kómir urlyǵyna ol jaqtaǵy parlament depýtattarynyń teń jartysynan astamynyń qatysy bar desedi. Mońǵolııa Bas Prokýrory birneshe depýtattar ústinen qylmystyq is qozǵaý máselesin qaraýda. Al el prezıdenti úkimet pen parlamentti taratý jóninde usynys jasady.Qazirge bıliktegi basty eki partııa buny talqylaýda. Parlament tóraǵasy urlyq boıynsha arnaıy komıssııa qursa, premer-mınıstriler kabıneti naqty bir sheshim, nemese tyǵyryqtan shyǵatyn usynystaryn jetkizbedi. Jalpy, kómir urlyǵymen bastalǵan máseleniń arty basqa da áleýmettik jaǵdaılar men eldegi ken, paıdaly qazbalardyń jaǵdaıyn qaıta qaraýǵa alyp keldi, - dep jazdy qandasymyz.
"Adyrna" ulttyq portaly
