Kóp qabatty úıden shyqqan órtten úsh adamdy qutqaryp, erlikpen qaza tapqan Asqar Zabıkýlınniń esimi elordadaǵy Esil aýdanyndaǵy kóshelerdiń birine beriledi. Bul týraly qala ákimdiginiń baspasóz qyzmeti aıtty, dep habarlaıdy «Adyrna» tilshisi.
«Astana onomastıkalyq komıssııasynyń otyrysynda Esil aýdanynda (Úrker TM) ornalasqan E-583 kóshesinde adamdardy qutqarǵan jáne órtti sóndirý kezinde erlikpen qaza tapqan Asqar Zabıkýlınniń esimin berý týraly sheshim qabyldandy. Batyr esimin ózi qyzmet etken №6 mamandandyrylǵan órt sóndirý bólimine berý, mekeme aldyna bıýst ornatý usynyldy. Sonymen qatar estelik sýretin shahardaǵy A.Pýshkın kóshesinde ornalasqan «Qutqarýshylar saıabaǵyndaǵy» aqparattyq taqtaǵa ornalastyrý týraly sheshim qabyldandy»,—dedi vedomstvo.
Aıta keteıik, buǵan deıin Memleket basshysynyń tapsyrmasy boıynsha qutqarýshy Asqar Zabıkýlınniń otbasyna úsh bólmeli páterdiń kilti tabystalǵan bolatyn.
