Qasym-Jomart Toqaev Úkimetke Ekibastuzdaǵy jaǵdaıdy qalypqa keltirýdi tapsyrdy. Bul týraly Memleket basshysynyń baspasóz hatshysy Rýslan Jeldibaı óziniń feısbýk paraqshasynda habarlady, dep jazady "Adyrna" ulttyq portaly.
"Prezıdent Premer-Mınıstr Álıhan Smaılovqa elimizdiń qalalaryndaǵy problema jıi týyndaıtyn energetıkalyq aktıvterdi memleket menshigine qaıtarý máselesin qarastyrýdy tapsyrdy. Sebebi atalmysh aktıvterdi sapasyz basqarý saldarynan jylý elektr stansalary apatqa jıi ushyrap, tutynýshylardy elektr qýatymen úzdiksiz qamtamasyz ete almaı otyr. Ekibastuzda ortalyq jylý berýdiń toqtap qalýynan habardar bolǵan Prezıdent qala turǵyndarynyń jaǵdaıyna alańdaýshylyq bildirdi. Turǵyndarǵa tıisti kómek beriledi. Memleket basshysynyń pikirinshe, azamattardyń turmys-tirshiligine qıyndyq týdyrýǵa jáne olardyń quqyn aıaqasty etýge jol berýge bolmaıdy. Úkimetke jáne oblys ákimdigine taıaý kúnderi Ekibastuzdaǵy jaǵdaıdy qalypqa keltirý, qaladaǵy aýyr ahýalǵa jol bergen adamdardy jaýapqa tartý jóninde tapsyrma berdi",- dep jazdy Rýslan Jeldibaı.
"Adyrna" ulttyq portaly
