Prezıdenttikke kandıdat Qasym-Jomart Toqaevtyń Respýblıkalyq qoǵamdyq shtabynyń músheleri Almaty turǵyndarymen birqatar kezdesý ótkizdi.
Almaty qalasynda ótken saılaýshylarmen kezdesýde Respýblıkalyq qoǵamdyq shtabtyń basshysy Erlan Qoshanov saılaý naýqany bastalǵannan beri elimizdiń barlyq óńirinde 20 myńnan astam úgit-nasıhat is-sharasy ótkenin atap ótti.
«Qasym-Jomart Toqaevtyń jaqtastary qalalardyń, aýdandardyń jáne shalǵaıdaǵy eldi mekenderdiń turǵyndarymen kezdesip, kandıdattyń saılaýaldy baǵdarlamasynyń negizgi baǵyttaryn túsindirdi. Jalpy, bir aıǵa jetpeıtin ýaqyt ishinde ótken úgit-nasıhat sharalaryna 2 mıllıonnan astam qazaqstandyq qatysty», - dedi Erlan Qoshanov.
Almatyda Ál-Farabı atyndaǵy QazUÝ jataqhanalarynyń birinde stýdenttermen ótken kezdesý barysynda shtab músheleri kandıdattyń jastar saıasatyn jetildirý jónindegi basymdyqtaryna nazar aýdardy.
Budan soń Qasym-Jomart Toqaevtyń jaqtastary saıasattanýshylarmen jáne sarapshylarmen saılaýaldy baǵdarlamanyń saıası ózgeristerge, memlekettik apparattyń tıimdiligin arttyrýǵa jáne azamattardyń quqyqtaryn qorǵaýǵa arnalǵan bólimin talqylady.
Osy kúni shaǵyn jáne orta bıznes ókilderimen kezdesý ótip, onyń barysynda RQSh músheleri kandıdattyń kásipkerlikti qoldaý jáne damytý jónindegi usynyp otyrǵan bastamalary týraly aıtyp berdi.
Zııaly qaýymmen kezdesýde RQSh músheleri kandıdattyń tarıhı murany saqtaý, mádenıetti qoldaý jáne otandyq ónerdi damytý boıynsha usynǵan sharalaryn talqylady.
