Tasmaǵambetov saılaýda Toqaevty qoldaýǵa shaqyrdy, dep jazady "Adyrna" ulttyq portaly
Ardaqty otandastar!
Bul jyl memleketimiz úshin erekshe qıyn jyl boldy. Táýelsizdik alǵaly beri alǵash ret elimiz eń basty, eń izgi qundylyqtaryn joǵaltýǵa shaq qaldy.
Tarıh kýá, mundaı jaǵdaıdan keıin kóp elder óz ózine kele almaı, ondaǵan jyldarǵa turalap qalady. Biraq osyǵan qaramastan bizdiń halyq, aýyrlyqqa maıyspaıtyn erik-jigeri men qaranardaı qaıyspaıtyn kúshin kórsetip, tórtkúl dúnıege óziniń órkenıetti ómirge degen haqyn pash etti.
Keshegi alasapyranda ortaq úıimizdegi bereke men tynyshtyq ta halqymyzdyń osynaý danalyǵy men birliginiń arqasynda, daralyǵy men iriliginiń arqasynda saqtaldy. Elimiz úshin sol bir syndarly saǵattarda Prezıdent Q.Toqaevtyń memlekettiń ydyraýyna jol bermeı, tizgindi nyq ustap otyrǵanyna barshamyz kýá boldyq. Sóz joq, bul ult aldyndaǵy, urpaq aldyndaǵy orasan zor jaýapkershilik.
Árıne, dál qazir árbir azamatymyz úshin eń mańyzdy másele ne? Qarapaıym, biraq óte qajet úsh nárse bar. Ol: erteńgi kúnge degen senimi, bala-shaǵasynyń amandyǵy, ózin beıqam sezinýi. Bul qundylyqtardyń qadiri, ásirese, aınaladaǵy qarýly qaqtyǵystar men mán-maǵynasyz qantógisterdi kórgende erekshe bilinedi.
Mine, osyndaı almaǵaıyp ýaqytta el tizginin sanasyna tabıǵattyń ózi darytqan geosaıası kóregendigi, týǵan halqynyń múddesin bıik qoıa alatyn dıplomatııalyq oı-órisi bar qaıratker, eń bastysy – memlekettiń taǵdyry úshin jaýapkershilikten taısalmaı, tik kóteretin tulǵa ustaý kerek. Óz basym bul qasıetterdiń barlyǵyn Qasym-Jomart Kemeluly Toqaevtyń boıynan kóremin.
Sondyqtan, búgingideı el-jurtymyz úshin syndarly ýaqytta men Qasym-Jomart Kemelulyn aldaǵy úlken saıası naýqan – Qazaqstan Respýblıkasy Prezıdentin saılaýda qoldaýǵa shaqyramyn.
Azamattarymyz týǵan el aldyndaǵy jaýapkershiligin sezinip, jumylǵan judyryqtaı aýyzbirshiligin tanytyp, durys tańdaý jasaıdy dep úmittenemin.
Tuıyq joldan adastyrmaı alyp shyǵatyn da, qaratúnek qıyndyqty jaryp shyǵatyn da – birlik! Osyny umytpaıyq, aǵaıyn!
Imanǵalı TASMAǴAMBETOV
