Feisbuk qoldanuşysy Säken Dıldahmet esımdı azamat jol üstınde bolǧan taŋǧajaiyp oqiǧamen bölıstı. Avtordyŋ jyly jazbasyn oqyǧan qalyŋ qazaqtyŋ közıne quanyştan jas ırkılıp, oqiǧa keiıpkerınıŋ eŋ janaşyr tılektesı men aqjoltai aǧaiynyna ainaldy, dep habarlaidy "Adyrna" ūlttyq portaly.
Qoǧam belsendısı Säken Dıldahmet quanyşty habarmen bölısıp, şaŋyraq qūndylyǧy men otbasyndaǧy bal baqytqa qatysty taǧlymdy oqiǧadan söz ettı. "Taksidegı quanyş" dep atalǧan oqiǧa tömendegıdei örıledı.
"40 minut būryn taksi şaqyrdym. Jambyldyq nömırlı jürgızuşı keldı. Joldaǧy keptelıstı qysqartu maqsatynda äŋgıme düken qūrdyq. Azat esımdı jıgıt Tarazdan 2 ai būryn astanaǧa köşıptı. Jerlesım bolǧandyqtan, anany-mynany sūrap äŋgımelestık. Astanaǧa jūmys babymen qonys audarypty. Sol jūmystan şyǧa sala, keşkısın osylai taksi bolyp qyzmet ısteidı eken. Qalany älı dūrys bılmeidı. Jol boiy tanystyryp keldım.
10 jyl bolypty otau qūrǧanyna. Bıraq älı perzent süimedık, talai emdeldık, sol baqytty kütıp jürmız deidı. Men ony qaita qoldap, demep, bärı jaqsy bolady dedım.
Üige jaqyndai bergende kelınşegı qoŋyrau şaldy. Anau Azat aiqailap, közınen jas şyqty. Suyq habar jetkızdı ma dep özımşe oilap qaldym.
Kölıktı joldyŋ jiegıne toqtatyp, dalaǧa atyp şyqty. Ūly Dalany basyna köterıp jügırıp, sekırıp kettı. Ne bolyp qaldy dep, men de şyǧyp jaǧdaidy sūradym.
Söitsek, kelınşegı köterıptı. Bır balaǧa zar bolǧan quanyştyŋ qandai bolatynyn özım kördım. Qūttyqtadym. Ol menı qūşaqtap, balaşa mäz bolyp kettı. Sol kölıkke mıngen men qyryqtyŋ bırı bolǧan qydyr şyǧarmyn dep oiladym.
Baqyt degen osyndai eken!" - dep tebırendı avtor.
Jylylyq esken jazbany oqyǧannan keiın köŋılı bosamaǧan jan qalmady. Jelı qoldanuşylarylarynyŋ:
"Aidaladaǧy men quanyp otyrmyn", Qandai keremet sezım! Aman-esen düniege kelsın! Endı sızge “Azat äke boldy” dep süiınşı sūraudy jazsyn! Ūl bolsa esımın Säken qoisa tıptı keremet","Qandai keremet jaŋalyq! Qanşa jyl boiy qinaldy","Osy oraida, adam taǧdyrynda neşe türlı bolatynyn bılmeitınder, oilanbaityndar, qalai bolsa solai söilep: nege bala tumaisyŋ; bala tumasaŋ, bärı beker; balaŋ bolmaǧan soŋ, aqyl aitpa degen siiaqty adamdy "kemsıtu" ärı jeke şekarany eskermei söilei beretını ökınıştı…Barşa adam balasy osylai baqytty bolsyn","Būrynǧy adamdar bıledı, jer audaru kerek dep aitatyn, auzyŋyz dualy bolǧany ǧoi, tek jaqsy närse aita berıŋız, Elge, qazaqqa qatysty jaqsy närselerdı köp aityŋyzşy",
"Dosym bar, äielı Qyzylordada kötermei jürgen, Astanaǧa köşken soŋ ekı balaly boldy. Klimat auystyrǧan dūrys",
"Quanyşy ūzaǧynan süiındırsın!" degen ızaşar tılekter janǧa jylylyq ūialatuda.
Qazaqtyŋ basy aman, bauyry bütın bolsyn! Şaŋyraǧynyŋ ışı janǧa, syrty malǧa tolsyn, aǧaiyn!
"Adyrna" ūlttyq portaly
Ūqsas jaŋalyqtar
