Qadirli baýyrlar!
«Qazaq halqynyń murasy» kitaptar serııasynyń Ult qundylyqtaryn saqtaý men nasıhattaýǵa baǵyttalǵan Qazaq kúntizbesinde 15 qazan – Memlekettik til kúni bolyp belgilengen. Bul kún qazaqtyń kórnekti saıası jáne qoǵam qaıratkeri Sáken Seıfýllınniń týǵan kúnine oraılastyryldy. Barlyqtaryńyzdy osynaý mán-mańyzy tereń, týǵan tilimizdiń abyroıyn asqaqtatýǵa baǵyttalǵan aıtýly kúnmen shyn júrekten quttyqtaımyn!
Bul kún bizdi qazaqtyń Alash zııalylarynyń eńbegimen qaýyshtyryp, olardyń jolyn jalǵastyrǵan azamattarymyzdyń ultqa qyzmetin pash etedi jáne osy arqyly jas urpaqqa ulttyq tárbıe berýdi kózdeıdi.
Sanaly ǵumyryn qazaqtyń irgelenýine arnaǵan S.Seıfýllın óz dáýirinde qazaq tiliniń memlekettik til mártebesin alýyna úlken eńbek sińirgen tarıhı tulǵa. Ol Halyq komıssarlary Keńesiniń Tóraǵasy qyzmetinde júrip «Keńse isterin qazaq tilinde júrgizý kerek» - dep arnaıy másele kóterip, osynyń nátıjesinde 1923 jylǵy qarashada jaryq kórgen Dekretpen Qazaq tiline memlekettik til dárejesi berildi. Osy qyzmette júrip ol A.Baıtursynulynyń 50-jyldyǵyn atap ótýdi, qazaq kınosyn qarjylandyrý isin, Qoja Ahmet Iasaýı kesenesin restavraııalaýǵa qarjy bólý, A.Zataevıchke qazaq án-kúılerin jınatý isin qolǵa aldy. Al «Qazaqty qazaq deıik, qateni túzeteıik» maqalasynda «…memleket atyn «Qazaq Respýblıkasy» dep ózgertip, memlekettik til qazaq tili bolý kerek» - dep bul máselege núkte qoıdy. Araǵa az ýaqyt salyp baryp 1925 jyly Qyrǵyz ASSR-i ataýy Qazaq ASSR-i bolyp ózgertildi.
Ulylarymyz atqarǵan osy eńbekter bizdiń urpaqqa da jaýapkershilik artady. Endeshe árýaqytta da ult múddesin esten shyǵarmaıyq. Memlekettik tilimiz jasaı bersin!
Qurmetpen,
Muhtar Shahanov,
Qazaqstannyń Eńbek eri
