Ämıre Qaşaubaev atyndaǧy dästürlı än oryndauşylar baiqauy ötedı

12.10.2022

5862

https://adyrna.kz/content/uploads/2022/10/a3c28e15-396c-43d7-8853-34264b84835c.jpeg

                                             
 18-19 qazanda QR Mädeniet jäne sport ministrlıgınıŋ qoldauymen Jambyl atyndaǧy Qazaq melekettık filarmoniiasy Ämıre Qaşaubaev atyndaǧy dästürlı än oryndauşylary baiqauyn ūiymdastyrady, dep habarlaidy “Adyrna” ūlttyq portaly.

17 qazan künı saǧat 12:00-de Jambyl atyndaǧy Qazaq memlekettık filarmoniiasynyŋ Ülken zalynyŋ foiesınde Ämıre Qaşaubaev atyndaǧy dästürlı än oryndauşylary baiqauynyŋ baspasöz konferensiiasy ötedı. 

Atalǧan baspasöz mäslihatynda Ämıre Qaşaubaev atyndaǧy dästürlı än oryndauşylary baiqauyn damytu jäne tanymal etu, dästürlı än önerınıŋ bügıngı kelbetı men nasihattalu mäselelelerı talqylanady. 

Spikerler:
Abdualiev Aqan Jylqyşybaiūly - Jambyl atyndaǧy Qazaq memlekettık filarmoniiasynyŋ direktory, Qazaqstannyŋ eŋbek sıŋırgen qairatkerı, ūiymdastyru alqasynyŋ töraǧasy;
Janpeiısov Nūrjan Qabimollaūly – Qazaqstannyŋ eŋbek sıŋırgen qairatkerı, T.Jürgenov atyndaǧy Qazaq ūlttyq öner akademiiasynyŋ professory, Ä.Qaşaubaev atyndaǧy Respublikalyq dästürlı än oryndauşylary baiqauynyŋ gran-pri iegerı, qazylar alqasynyŋ töraǧasy;
Janpeiısova Säule Stahanşylqyzy - Qazaqstannyŋ eŋbek sıŋırgen qairatkerı, qazylar alqasynyŋ müşesı;
Amangeldı Ūzaqbaiūly Küzeubai - Qūrmanǧazy atyndaǧy Qazaq Ūlttyq konservatoriiasynyyŋ Halyq muzykasy fakultetı, halyq änderı kafedrasynyŋ meŋgeruşısı, dosent, qazylar alqasynyŋ müşesı;
Aitbaev Erbol Hamitūly - S.Toraiǧyrov atyndaǧy universitettıŋ professory, Qazaqstannyŋ eŋbek sıŋırgen qairatkerı, qazylar alqasynyŋ müşesı;

Qazaqtyŋ än önerı tarih köşın ǧasyrdan ǧasyrǧa jöneltısıp, ūrpaqtan ūrpaqqa miras bolyp, bügıngı künge deiın özınıŋ sabaqtastyǧyn joǧaltpai kele jatyr. Ūltymyzdyŋ asa bai än önerın damytuǧa Bırjan sal, Aqan serı, Mūhit, Jaiau Mūsa, Ükılı Ybyrai, Äset, Estai, Nartai, Kenen, Qapez siiaqty halyq kompozitorlary ölşeusız üles qosyp, ony käsıbi deŋgeige köterdı. Al osy aǧa buynnan qalǧan mol mūrany keiıngılerge aina-qatesız oryndap jetkızuge Ämıre Qaşaubaev, Qali Baijanov, Ǧabbas Aitbaev, Manarbek Erjanov, Jüsıpbek Elebekov, Ǧarifolla Qūrmanǧaliev, t.b. saŋlaqtardyŋ qosqan eŋbegı zor. Sonyŋ ışınde qazaqtyŋ änın būryn bolmaǧan biık örege köterıp, älemge tūŋǧyş ret tanytqan Ämıre Qaşaubaevtyŋ orny bölek. Oryndauşylyq şeberlıgı, än salu erekşelıgı, ülgısı öz aldyna bır mektep dese bolady. Onyŋ oryndauyndaǧy «Aǧaş aiaq», «Balqadişa», «Bes qarager», «Dudarai», t.b. änderı älı künge deiın halyq jadynda. 

        Qazaq än önerındegı dara tūlǧa, qaitalanbas daryn iesınıŋ şyǧarmaşylyǧyn därıptep, esımın ardaqtap, mäŋgı este saqtau maqsatynda  seksenınşı jyldary Ämıre Qaşaubaev atyndaǧy dästürlı oryndauşylar baiqauy bastau aldy. Būl baiqau elımızdegı dästürlı änderdı nasihattauǧa arnalǧan eleulı mädeni şara bolyp esepteledı. Biyl QR Mädeniet jäne sport ministrlıgı baiqaudy qaita jandandyryp, qoldap, ūiymdastyrudy Jambyl atyndaǧy Qazaq Memlekettık filarmoniia ūjymyna ülken senımmen tapsyrdy. 

        Atalmyş mädeni şaranyŋ basty baǧyty - qazaq halqynyŋ dästürlı än önerın damyta otyryp, daryndy jastardyŋ oryndauşylyq şeberlıgın ūştau, ūly änşınıŋ töl mūrasyn keŋınen nasihattap, ūlttyq än önerınıŋ jetıstıkterın jaŋǧyrtyp, sol arqyly jas buynnyŋ ruhani jan düniesın tärbieleudı maqsat tūtady. 

        Ämıre Qaşaubaev atyndaǧy dästürlı oryndauşylar baiqauy köptegen talant ielerın jinady. Baiqaudan keiın jas änşılerdıŋ oryndauşylyq şeberlıgı ösıp, Otandyq sahnadan öz ornyn tapqandar da az emes. Olardyŋ qatarynda än önerınıŋ  saŋlaqtary – M.Mükamanov, S.Janpeiısova, S.Ospanov, M.Adambekov, D.Ömıräliev, S.Taudaeva, B.Üderbaeva, Ǧ.Mūhamedin, S. Äbdırahmanov, Q. Kakimov, E.Aitbaev,  E.Şükımanov,  R.Stamǧaziev, E.Rysqali, A.Qosanova, Ä. Mūsa, E. Stamǧaziev, G. Sarina, K.Tölenbaeva t.b. atap ötuge bolady.

        “El ışı – öner kenışı” deidı dana halqymyz. Ärine, qazaqtyŋ dästürlı än oryndauşylary mūnymen şektelmesı anyq. Endeşe, būl baiqau aldaǧy uaqytta da jas önerpazdarmen tolysyp, bügıngı ūrpaqty halqymyzdyŋ baǧa jetpes mol muzykalyq mūrasymen susyndata beredı dep senemız.