18-19 qazanda QR Mádenıet jáne sport mınıstrliginiń qoldaýymen Jambyl atyndaǵy Qazaq melekettik fılarmonııasy Ámire Qashaýbaev atyndaǵy dástúrli án oryndaýshylary baıqaýyn uıymdastyrady, dep habarlaıdy “Adyrna” ulttyq portaly.
17 qazan kúni saǵat 12:00-de Jambyl atyndaǵy Qazaq memlekettik fılarmonııasynyń Úlken zalynyń foıesinde Ámire Qashaýbaev atyndaǵy dástúrli án oryndaýshylary baıqaýynyń baspasóz konferenııasy ótedi.
Atalǵan baspasóz máslıhatynda Ámire Qashaýbaev atyndaǵy dástúrli án oryndaýshylary baıqaýyn damytý jáne tanymal etý, dástúrli án óneriniń búgingi kelbeti men nasıhattalý máseleleleri talqylanady.
Spıkerler:
- Abdýalıev Aqan Jylqyshybaıuly - Jambyl atyndaǵy Qazaq memlekettik fılarmonııasynyń dırektory, Qazaqstannyń eńbek sińirgen qaıratkeri, uıymdastyrý alqasynyń tóraǵasy;
- Janpeıisov Nurjan Qabımollauly – Qazaqstannyń eńbek sińirgen qaıratkeri, T.Júrgenov atyndaǵy Qazaq ulttyq óner akademııasynyń professory, Á.Qashaýbaev atyndaǵy Respýblıkalyq dástúrli án oryndaýshylary baıqaýynyń gran-prı ıegeri, qazylar alqasynyń tóraǵasy;
- Janpeıisova Sáýle Stahanshylqyzy - Qazaqstannyń eńbek sińirgen qaıratkeri, qazylar alqasynyń múshesi;
- Amangeldi Uzaqbaıuly Kúzeýbaı - Qurmanǵazy atyndaǵy Qazaq Ulttyq konservatorııasynyyń Halyq mýzykasy fakýlteti, halyq ánderi kafedrasynyń meńgerýshisi, doent, qazylar alqasynyń múshesi;
- Aıtbaev Erbol Hamıtuly - S.Toraıǵyrov atyndaǵy ýnıversıtettiń professory, Qazaqstannyń eńbek sińirgen qaıratkeri, qazylar alqasynyń múshesi;
Qazaqtyń án óneri tarıh kóshin ǵasyrdan ǵasyrǵa jóneltisip, urpaqtan urpaqqa mıras bolyp, búgingi kúnge deıin óziniń sabaqtastyǵyn joǵaltpaı kele jatyr. Ultymyzdyń asa baı án ónerin damytýǵa Birjan sal, Aqan seri, Muhıt, Jaıaý Musa, Úkili Ybyraı, Áset, Estaı, Nartaı, Kenen, Qapez sııaqty halyq kompozıtorlary ólsheýsiz úles qosyp, ony kásibı deńgeıge kóterdi. Al osy aǵa býynnan qalǵan mol murany keıingilerge aına-qatesiz oryndap jetkizýge Ámire Qashaýbaev, Qalı Baıjanov, Ǵabbas Aıtbaev, Manarbek Erjanov, Júsipbek Elebekov, Ǵarıfolla Qurmanǵalıev, t.b. sańlaqtardyń qosqan eńbegi zor. Sonyń ishinde qazaqtyń ánin buryn bolmaǵan bıik órege kóterip, álemge tuńǵysh ret tanytqan Ámire Qashaýbaevtyń orny bólek. Oryndaýshylyq sheberligi, án salý ereksheligi, úlgisi óz aldyna bir mektep dese bolady. Onyń oryndaýyndaǵy «Aǵash aıaq», «Balqadısha», «Bes qarager», «Dýdaraı», t.b. ánderi áli kúnge deıin halyq jadynda.
Qazaq án ónerindegi dara tulǵa, qaıtalanbas daryn ıesiniń shyǵarmashylyǵyn dáriptep, esimin ardaqtap, máńgi este saqtaý maqsatynda sekseninshi jyldary Ámire Qashaýbaev atyndaǵy dástúrli oryndaýshylar baıqaýy bastaý aldy. Bul baıqaý elimizdegi dástúrli ánderdi nasıhattaýǵa arnalǵan eleýli mádenı shara bolyp esepteledi. Bıyl QR Mádenıet jáne sport mınıstrligi baıqaýdy qaıta jandandyryp, qoldap, uıymdastyrýdy Jambyl atyndaǵy Qazaq Memlekettik fılarmonııa ujymyna úlken senimmen tapsyrdy.
Atalmysh mádenı sharanyń basty baǵyty - qazaq halqynyń dástúrli án ónerin damyta otyryp, daryndy jastardyń oryndaýshylyq sheberligin ushtaý, uly ánshiniń tól murasyn keńinen nasıhattap, ulttyq án óneriniń jetistikterin jańǵyrtyp, sol arqyly jas býynnyń rýhanı jan dúnıesin tárbıeleýdi maqsat tutady.
Ámire Qashaýbaev atyndaǵy dástúrli oryndaýshylar baıqaýy kóptegen talant ıelerin jınady. Baıqaýdan keıin jas ánshilerdiń oryndaýshylyq sheberligi ósip, Otandyq sahnadan óz ornyn tapqandar da az emes. Olardyń qatarynda án óneriniń sańlaqtary – M.Múkamanov, S.Janpeıisova, S.Ospanov, M.Adambekov, D.Ómirálıev, S.Taýdaeva, B.Úderbaeva, Ǵ.Muhamedın, S. Ábdirahmanov, Q. Kakımov, E.Aıtbaev, E.Shúkimanov, R.Stamǵazıev, E.Rysqalı, A.Qosanova, Á. Musa, E. Stamǵazıev, G. Sarına, K.Tólenbaeva t.b. atap ótýge bolady.
“El ishi – óner kenishi” deıdi dana halqymyz. Árıne, qazaqtyń dástúrli án oryndaýshylary munymen shektelmesi anyq. Endeshe, bul baıqaý aldaǵy ýaqytta da jas ónerpazdarmen tolysyp, búgingi urpaqty halqymyzdyń baǵa jetpes mol mýzykalyq murasymen sýsyndata beredi dep senemiz.
