Kiberşabuyldardy arnaiy jüieler jasap jatqanyn Aqparat jäne qoǧamdyq damu ministrı Darhan Qydyrälı aitty. Ministr būl turaly Qazaqstan ūlttyq arnasynyŋ Apta baǧdarlamasyna bergen sūhbaty barysynda mälımdedı, dep habarlaidy “Adyrna” ūlttyq portaly.
Aita keteiık, Abai oblysyna sapary kezınde Memleket basşysy kiberşabuyldar köbeiıp ketkendıgı turaly aita ketken edı. Vedomstvoǧa kelgenıne bır ai bolǧan ministr Darhan Qydyrälı de osyǧan qatysty öz pıkırın bıldırdı.
“Jalpy ǧalymdar «postşyndyq» dep ataǧan osy kezeŋde gibridtık soǧys älemde örşıp tūr. Mūndai myltyqsyz maidan kezınde dabyra-dabyl, anyqtalmaǧan aqparat, däieksız derekter köp jaǧdaida jūrtty şatastyrady, oqyrmandy adastyrady. Sondyqtan osyndai aqparattyq şabuyldyŋ qazır bız Qazaqstanǧa da baǧyttalǧanyn körıp otyrmyz. Būl turaly Prezident te Semeidegı sözınde atap öttı. Şyn mänınde būl aqparattyq soǧys kezınde eldegı bırlıktı, berekenı, jalpy täuelsızdıktı tūǧyrly etu üşın tek qana jazarman qauymǧa ǧana emes, tūtynuşyǧa da ülken jauapkerşılık jükteledı. Öitkenı bız sol aqparatty taratu arqyly keide zaŋ būzuşylyq jasap otyrǧanymyzdy nemese tekserılmegen derektı taratyp otyrǧanymyzdy aŋǧarmai qaluymyz mümkın, - dedı ol.
Ministrdıŋ aituynşa, osyǧan bailanysty jalpy aqparattyq soǧys kezeŋınde kez kelgen azamatqa ülken jauapkerşılık jükteledı.
“Ötkende DoS-şabuyl dep tehnikalyq jaǧy da aityldy. Sodan keiın kiberşabuyldardyŋ da üdegenın körıp otyrmyz. Mysaly, keşe Pavlodarda arnaiy bır feik-aqparat tarady. Ony da şeteldık azamat taratqanyn bıldık. Soŋǧy bır aidy alyp qarasaq, otyz künnıŋ ışınde Dınder sezı öttı, Rim papasy keldı. Qazaqstan Prezidentınıŋ Niu-Iorkke, Londonǧa syrtqy saparlary öte ülken rezonansqa ie boldy. Sondyqtan Qazaqstandy bıreuler tūraqsyzdyqtyŋ aralyna ainaldyrǧysy keletın siiaqty. Mūnyŋ sailaualdy kezeŋmen tūspa-tūs keluı de oilandyrmai qoimaidy. Sol üşın mūny arnaiy jüieler jasap jatqanyn baiqau qiyn emes”, - deidı Darhan Qydyrälı.
“Adyrna” ūlttyq portaly
