Memleket basshysy Q.Toqaev osy qaǵıdany berik ustanyp otyr. Elge jetekshilik etetin basshynyń óz týystaryn bılikke tartpaýy, Prezıdent saılaýyna qaıta-qaıta túspeýi, bir márte ǵana jeti jylǵa saılanýy, ádiletti, adal qyzmet atqarýy, jemqorlyqqa boı aldyrmaýy – mine, osyndaı qaǵıdalardy berik ustanamyn dep halyqqa Joldaýyn jarııalaýy kópshiliktiń kókeıine qonady. Japon fılosofııasynda ózgeristi ózińnen basta degen qaǵıda bar. Ol bizdiń Memleket basshysy Q.Toqaevtyń boıyndaǵy burynnan qalyptasqan izgi qasıet. Aıtqandaryn asyqpaı, aptyqpaı, birtindep júzege asyryp, oryndaı bastaǵanyn halyq kórip otyr.
Minekı, elimizde kezekten tys Prezıdent saılaýy ótetin kún de belgili boldy. Alda úlken ózgerister kútip tur. Prezıdent saılaýynan keıin Parlament, jergilikti máslıhat saılaýlary da, Úkimet quramyn qaıta jasaqtaý sekildi aýqymdy sharalar da kún tártibinde tur. Osynyń bári demokratııa jolymen, ádil saılaý arqyly júzege asyrylatynyn Memleket basshysy qadap aıtty.
Prezıdent Q.Toqaev elimizde minsiz qoǵam ornasa eken dep armandaıdy. Demek, minsiz memleketti basqaratyn adamnyń ózi aldymen sol orynǵa laıyqty jan bolǵany abzal. Eń aldymen, ol adam asqan ádiletti bolýy tıis. Adamdar adaldyqty, ádildikti arman etedi. Basshylardyń qara qyldy qaq jarǵan ádiletti, týrashyl bolǵanyn qalaıdy. Osyndaı Memleket basshysyna laıyq azamattyń boıynda birneshe qasıet tabylýy tıis. Aldymen, dene múshesi saý, densaýlyǵy myqty, este saqtaý qabileti kúshti, meılinshe zerek, zerdeli, kóp tildi meńgergen, búkil oıyn sheber jetkize biletin, jurtty birden baýrap alatyn sheshen bolýy kerek. Ózgelerdi de tyńdaı biletin, sodan iske paıdaly jerin alyp, qorytyndy shyǵaratyn adam basshyǵa laıyq.
Kóp máseleni aqyldy adamdar sheshýi qajet. Nege Memleket basshysyn halyq bolyp saılaıdy? Óıtkeni, sol halyqtan eń aqyldy, eń bilimdi, kózqarasy erekshe, tabıǵaty basqasha, talaby artylyp turǵan adamdy tańdap alǵysy keledi. Solaı bolýy kerek. Sonda ǵana prezıdentter birimen-biri til tabysady. Sonda ǵana prezıdentter halyqtyń ıgiligin oılaıdy. Memleket basshysy fılosof, saıasatker, áleýmettanýshy, álem dinderine de sergek qaraıtyn jan-jaqty azamat bolýy tıis. Menińshe, Qasym-Jomart Toqaevtyń boıynan osy qasıetter tabylady.
El ishinde eski kadrlarmen Jańa Qazaqstandy qalaı quramyz degen oılar aıtylyp júr. Oryndy pikir. Sóıtse de, eskiniń bárin bir sátte sypyryp tastap, túgel jańalaıyn dep otyrǵan eshkim joq. Halyq arasynda tájirıbeli, oıly, halyqqa shyn janashyr, memleket múddesin oılaıtyn, adal qyzmet etetin, ádiletti jolmen bılikke kele alatyn azamattar barshylyq.
Osy joly halyq Prezıdent saılaýynda úlken belsendilik tanyta alady. Soǵan qulshynyp otyr. Jurtshylyq budan bylaı Prezıdentti eki ret saılaýǵa jol bermeıdi. Ol Konstıtýııada anyq aıtylǵan. Endi jańa saıası partııalar belsenip shyǵa bastaıdy. Bul degenińiz, aldaǵy ýaqytta bir-birimen básekelese alatyn saıası uıymdar óz kandıdattarynyń arasynan myqty tulǵalardy alǵa tartady. Ata Zańǵa sáıkes Prezıdent bir ret qana saılanatyn bolsa, eskige, ádiletsizdikke jol berilmeıdi. Demek, aldaǵy jeti jylda Qazaqstanda úlken ózgerister bolady dep kútilýde.
Prezıdent saılaýyna ózin-ózi usynatyn, tipti partııada joq azamattar da saılaýǵa túse alady. Ol múmkin, depýtat, mınıstr, qoǵam qaıratkeri de, tipti qarapaıym, oıy bar azamat ta bolýy múmkin. Menińshe, Prezıdent qyryq jastan asqan, memlekettik tildi jetik meńgergen, eldiń damýyna, memlekettiń qaýipsizdigine Qazaqstan halqyna ádil de adal, jan-tánimen qyzmet etýge daıyn azamat bolýy tıis.
Prezıdent saılaýy elimizdegi eń basty saıası oqıǵa. Bul saılaýǵa kez-kelgen oppozıııalyq kúshter de qatysady. Bul naǵyz demokratııalyq kórinis. Árbir saıası partııa kúreske daıyn bolýy tıis. Eldiń búkil saıası júıesin túbegeıli ózgertemiz dedi Q.Toqaev. Demek, búkil quram jańarady. Senim mandaty halyq senimine jumys isteıtin bolady. Osydan baryp halyq senetin bılik, áleýmettik ádilettilik qalyptasýy kerek. Ekonomıkalyq saıasat durys bolýy tıis. Ol eldiń damýyn jańa satyǵa kóteredi.
Myqty básekeles bola alatyn, saılaýaldy baǵdarlamalary ótimdi, senimdi bolsa ǵana halyqtan qoldaý tabady. Halyq ádil saılaýdy kútedi. Aldaǵy kúnderde tynyshtyq, turaqtylyq, ádildik bolýy tıis.
Saıasat BEIISBAI, Fılosofııa, saıasattaný jáne dintaný ınstıtýtynyń bas sarapshysy
