"Äbılov bızdı el aldynda qaralady!": Abzal Qūspan sotqa ne üşın jügıngenın tüsındırdı

"Kei azamattar jekeme şyǧyp, al nomerımdı bıletınder vatsap arqyly «Bolat Äbılovqa qatysty sot ne boldy» - dep sūrauda. Būǧan, osy kezge deiın seriialy türde posttar jariialap kele jatyp, kılt üzıp tastaǧanym da äser etse kerek. Oǧan sebep – prezident öz Joldauynda biyl merzımınen būryn sailau bolatynyn aityp, barlyǧynyŋ nazary sol jaqqa auyp ketkesın, qūiysqanǧa qystyrylǧandai bolmaiyn dep oilaǧam. Söitsem Äbılov taqyryby köpşılıkke älı qyzyq eken. Sondyqtan, köp sozbai qysqa-nūsqa, eşqandai emosiiasyz, meilınşe tolyq aqparat bere keteiınde, doǧaraiyn. Sonymen, men ne üşın sotqa jügınuge mäjbür boldym? Nazarlaryŋyzǧa ekı videodan üzındı ūsynamyn. Bırınşısınde Äbılov interviu berıp otyryp, menı jäne Amanat komissiiasyn körıneu qaralaidy, iaǧni jala jabady", - deidı Abzal Qūspan.

"Äuelı, jürgızuşınıŋ sūraǧyna orai «Abzal Qūspan jäne Aiman Omarova Bilıktıŋ, Ükımettıŋ qyzyl advokattary» - dep alady da, oǧan dälel retınde myna sözderdı aitady (sözbe-söz); «Onyŋ aitqan sözı, kameraǧa aitqan sözı, Qosaidyŋ ol auruhanada jatqanda, auruhanaǧa polisiia kelıp, olardy türmege alyp keldı, anau jerge tastap ūrdy, soqty, pytkany jasady da, sol qaŋtar aiynda dala suyq qoi, tereze syndyrǧan aşyq, 15 adam, kamera 5 adamǧa, jerde jatyr. Sol künde (!) esık aşylyp advokat tūr – Abzal Qūspan. Men sondai adammyn, mıne prokuror qasymda, polisiia qasymda qandai jaloba. Bız bärın aittyq, betıne aittyq, Abzaldyŋ betıne. Ol jazdy bırdeŋe, esık jabyldy, bıttı! Eşteme özgergen joq! Pytka, jerde jatyr, tamaq bermeidı, su bermeidı. Mını būl ne?». Myna sözderdı tyŋdaǧan adam bızdı, iaǧni komissiiany adamdardy ūryp jatqan sätte kameraǧa kelıp, eşqandai kömek körsetpesten ketıp qaldy jäne bız ketkennen keiınde azaptau jalǧasqan dep tura tüsınedı, solai ǧoi?Al endı, ekınşı videoda sol Äbılov sılteme jasaǧan «Qaŋtar» qorynyŋ ūiymdastyrǧan press-konferensiiasynda Qosai Mahanbaevtyŋ aitqany, oǧan säikes; ūryp soǧu 8 qaŋtarda oryn alǧan, 3 kün boiy, iaǧni 11 qaŋtarǧa deiın as-su bermegen, 15 qaŋtarǧa deiın salqyn jerde jatqan, al men bastaǧan komissiia 25 qaŋtarda kırgenbız. Sol kezde ol osy jaǧdaidyŋ bärın bızge aitqan. Bıraq, köpşılıkke taratqan aqparatynda Bolat Äbılov bızdı tek qana «bilıktıŋ adamy», «qyzyl advokat» dep aitqany üşın sotqa berdı dep körsettı", - deidı zaŋger.

"Şyndyǧynda sotqa jügınuımızdıŋ eŋ negızgı sebebı Qosai aitty dep bızdı el aldynda qaralauy bolatyn jäne ol tek menıŋ emes, bükıl komissiiamyzǧa jabylǧan jala edı.​ Ötken aptada Almaty qalalyq sotynda Äbılovtyŋ sot Qaulysyna şaǧymy qaraldy. Eŋ qyzyǧy, Bökeŋ öz sözderınıŋ dälelı retınde osy men jalǧaǧan Qosaidyŋ videosyn jalǧapty! Bız öz kezegımızde Qosai Mahanbaevtyŋ aitqandaryn tolyq rastaimyz, ol turaly bırınşı satydaǧy sotta da, keşegı apelliasiialyq alqaǧa da aittyq. Jäne Qosaidyŋ mälımdemesınen keiın, araǧa 5 kün salyp, QR Bas Prokuroryna qorlau faktılerı boiynşa hatta joldadyq. Qorlau faktılerı turaly hatymyzda bırınşı bolyp sol Qosaidyŋ aitqandaryna sılteme jasadyq. Bas Prokuror tarapynan qorlau faktısımen qylmystyq ıs qozǧalǧany turaly jauap keldı. Osynyŋ bärı sotqa bızdıŋ tarapymyzdan dälel retınde ūsynyldy. Nätijesınde, äkımşılık sot şeşımı özgerıssız qaldyryldy, şeşım küşıne endı.​ Bıraq, Bolat Äbılov osynyŋ bärın köre-bıle tūra, öz sözınen bas tartpaitynyn aityp, bızdıŋ komissiianyŋ däl sol tūtqyndardy ūryp-soǧyp, qorlap jatqan sätın däleldeimın dep tabandap tūryp aldy. Dälel ūsyna almai sot tarapynan aiyppūl salynsa «bilık oppozisiiaǧa qysym jasauda» -dep oibailaidy. Eger ol «Qosaidyŋ aitqandaryn qate tüsınıppın» - dep, öz aitqanynan bas tartsa eşteŋe de bolmas edı. Tıptı bızge onyŋ keşırım sūraǧany da maŋyzdy emes edı, Daneş Baibolatovpen qalai kelıssem, onymen de solai kelıse salatyn şarua bolatyn", - deidı Abzal Qūspan.