Qasym-Jomart Toqaev Qostanaı oblysynda orman órtinen zardap shekkendermen kezdesti, dep habarlaıdy «Adyrna» tilshisi Aqordaǵa silteme jasap.
Shuǵyl áreket etý shtaby otyrysynan keıin Memleket basshysy orman órtinen zardap shekken Amanqaraǵaı aýylynyń aýmaǵyn aralady.
Memleket basshysy Áýlıekól aýylyndaǵy mektepte ornalasqan evakýaııalaý pýnktinde zardap shekken azamattarmen kezdesip, gýmanıtarlyq kómek taratý pýnktine bardy.
Zardap shekkendermen kezdesý barysynda Qasym-Jomart Toqaev Úkimet qıyn jaǵdaıdy eńserý úshin barlyq sharalardy qabyldaıtynyn aıtty.
– Ókinishke qaraı, úlken órt boldy. Degenmen tıisti kómek kórsetiledi. Sizderdiń baspanasyz qalǵandaryńyzdy bilemin. Úkimet eki, eki jarym aıda sizderge burynǵydan áldeqaıda jaqsy jańa úıler salyp beredi, – dedi Memleket basshysy.
Prezıdent eriktilermen áńgimelesip, olarǵa kórsetken kómegi úshin alǵys aıtty.
