Janbolat Mamaı ózine qastandyq jasalýy múmkin ekenin aıtyp, málimdeme jasady. Belsendiniń málimdemesin Facebook jelisinde Inga Imanbaı jarııalady.
Aıta keteıik, ol Almatydaǵy qańtar oqıǵasy kezindegi tártipsizdikterge qatysty jáne jalǵan aqparat taratýǵa baılanysty qamalǵan bolatyn.
“ Meniń, jarty jyldan astam, Almatydaǵy tergeý ızolıatorynda jatqanymdy bilesizder. Osy ýaqyt ishinde, ózime qarsy qandaı da bir qorqytý bolmasa kúsh kórsetken oqıǵa bolǵan emes. Alaıda, keshe men ózime qastandyq jasalmaqshy bolyp jatyr degen habar aldym. Maǵan «Mamaı ózi YouTube-te jarııalaǵan bir vıdeo úshin basymen jaýap beredi» dep jetkizdi. Bul kimniń sálemi dep suraǵanda, olar ózi de qamaýda otyrǵan «Dıkıı Arman» – Arman Jumageldıevten dep jaýap berdi. Shynymen-aq, ózimniń bir sózimde ony synaǵanym bar. Meniń oıymsha, bul «sálemniń» artynda, maǵan qastandyq uıymdastyryp jatqan, arnaıy qyzmetter turýy ábden múmkin.
Altynbek Sársenbaıulynyń ólimi esterińizde bolar? Namysyna tıgen sózder aıtty-mys, eshkimge jábiri joq Útembaev tapsyrys bergen bolyp shyqpap pa edi? Bálkim, bılik maǵan qastandyq jasap, bar kináni qylmys áleminiń bedeldisine arta salmaq ta shyǵar. Ózim alǵan habarǵa qatysty meniń oıym osyndaı. Maǵan qatysty qandaı da bir qastandyqtyń artynda, qashan da, arnaıy qyzmetter men Qazaqstan bıligi turatyn bolady dep ashyq, resmı túrde málimdeımin! Túrmede eshkimmen ózara kıkiljińim joq, eshqashan da janjaldasqan emespin. Quqyq qorǵaýshylardan, jýrnalısterden, dıplomattardan jáne múddeli barlyq jandardan basyma túsken osy jaǵdaıǵa nazar aýdarýyn ótinemin”, – dedi Mamaı.
”Adyrna” ulttyq portaly
