Ózbekstanda bokstan eresekter arasynda ótken álem chempıonatynda jeńiske jetip, altyn júlde alǵan Sanjar Táshkenbaıǵa páter kilti tabys etildi, dep habarlaıdy “Adyrna” ulttyq portaly.
Oǵan bir bólmeli páterdi Beles qurylys kompanııasynyń dırektory Mahat Tóreáli tabys etti. Sonymen birge, ol álem chempıony men onyń jeke jattyqtyrýshysy Nurjan Nasanovtyń astyna sáıgúlik mingizip, qurmet kórsetti.
Sanjardyń ata-anasynyń aıtýynsha, olar Astanada 20 jyldan beri páter jaldap turady. Anasy balasynyń jańa páter alǵanyn kórip, qýanyshy qoınyna syımaı jatqanyn jetkizdi. Boksshynyń ózi de qurylys kompanııasynyń basshysyna alǵys aıtyp, jankúıerlerge qoldaý kórsetkenderine rızashylyǵyn bildirdi.
“Sizder bizdi qoldaýda sharshamasańyzdar, biz de bıik shyńdardan kórinýden sharshamaımyz”, – dedi Sanjar Táshkenbaı.
Aıta ketsek, boksshy Tashkentte 48 kelige deıingi salmaqta el namysyn qorǵap, fınalda Grýzııanyń ókili Sahıl Alahverdovıdi jeńgen bolatyn.
