Elde «Zeıindi myń bala» áleýmettik jobasynyń jeńimpazdary anyqtaldy. Qaıyrymdylyq qorlardyń biri uıymdastyrǵan sharaǵa 1500-nan asa ótinish kelip túsken, dep habarlaıdy «Adyrna» tilshisi «Habar 24»-ke silteme jasap.
Qujatty irikteýge bir apta ýaqyt jumsaldy.
Uıymdastyrýshylar arnaıy saıtqa joldanǵan qujattar arasynan az qamtylǵan jáne kópbalaly otbasylardan shyqqan bilimdi balalarǵa basymdyq bergen.
Joba aıasynda qaıyrymdy jandardyń qoldaýymen 30 mln teńge jınaldy. Iaǵnı myń balaǵa mektepke daıyndalýǵa 30 myń teńge kóleminde sertıfıkat tabystalady.
«Zeıindi myń bala qaıyrymdylyq jobasy osy ýaqytqa deıin bir aı kóleminde ótti. Bizge 1500 asa ótinish keldi. Ol ótinishter arasynda myń adamdy iriktep alyp, biz búgingi tańda marapattap jatyrmyz. Bul respýblıka boıynsha. Úlken joba bolǵandyqtan áli de jalǵasyn tabady dep oılaımyz. Biz bilimdi jastardy árqashan qoldaımyz»,–dedi uıymdastyrýshy Baljan Erlanqyzy.
