Pavlodar qalasynyŋ polisiiasy 20 jastaǧy qyzdy kırpışpen ūrǧan er adamdy ızdeuge kırıstı. Būl turaly Polisia.kz. jariialady, dep habarlaidy “Adyrna” ūlttyq portaly.
Oqiǧa beinebaqylau kamerasyna jazylyp qalǧan. Qala tūrǧyny kıreberıste esıktı aşaiyn dep tūrǧanda artynan er adam jügırıp kelıp, kırpışpen bırneşe ret basynan ūrǧan. Er adamnyŋ bet-älpetı anyq körınıp tūr. Qyz ony iterıp jıbergen. Qylmysker qaşyp kettı.
Resmi mälımetke säikes, 21 tamyzda tüngı saǧat 01.10 şamasynda Pavlodar qalasynyŋ tūrǧyny tanysyna qonaqqa taksimen kelgen. Sol kezde belgısız bıreu ony kırpışpen ūrǧan. Zardap şekken qyz tüsten keiın auruhanaǧa bardy. Oǧan "miy şaiqalǧan" degen diagnoz qoidy. Qyz auruhanaǧa jatudan bas tartty. Al ekı künnen keiın 23 tamyzda polisiiaǧa aryz tüsırgen.
Qazırgı kezde būzaqylyq boiynşa sotqa deiıngı tergeu şaralary bastaldy. Sot-medisinalyq saraptama taǧaiyndaldy.
Būzaqynyŋ jeke basyn anyqtau boiynşa jedel-ızdestıru ıs-şaralary bastaldy. Polisiia videodaǧy er adamdy tanyǧandardy 102-ge habarlasudy sūraidy.
”Adyrna” ūlttyq portaly
