Keshe Almatydaǵy eń tanymal meıramhanalardyń birinde tanymal bloger, psıholog, kásipker Balhııa Baltabaıdyń toıy dúrildep ótti. Sońǵy jyldary qazaq qyzdaryna ıslamı psıhologııa taqyrybynda trenıngter ótkizip, halyq kóńilinen shyǵa bilgen blogerdiń tańdaýy Murat Anarbek esimdi jigitke túsipti. On eki jyl buryn sezimin bildirgen jigittiń usynysyn endi qabyl alǵan Balhııa Baltabaı hanym áleýmettik jelidegi paraqshasynda toıdyń erekshe ótetinin aldyn ala aıtqan bolatyn, dep habarlaıdy «Alash aınasy».
Rasynda da, toı qonaqtaryna tost berilmeı tek oıyn oınatylyp, qonaqtardy bıletip, estrada juldyzdarynyń án shashýymen ótken toıdyń shoý túrinde aıryqsha ótkeni baıqalady. Toqtar men Beıbit, Qýandyq Rahym, Búrkit pen Aısha, jastardyń súıikti toby Kalıfornııa sekildi estrada juldyzdary da toıda ónger kórsetti. Toı tizginin belgili asaba Erlan Qulshynbaev qolǵa alyp, toı kórigin qyzdyra tústi.
Atap óter jaıt osy ýaqytqa deıin qaıyrymdylyq isterimen jıi aınalysatyn bloger halyqtyń da súıiktisine aınalǵany sonshalyq jas jubaılardyń toıyna elimizdiń túkpir túkpirindegi halyq qyzyǵýshylyq tanytqan. Sondyqtan jas jubaılardyń toıyn alystan bolsa da tamashalaýǵa tyrysyp tikeleı efırdi aqyly kórýge tyrysqan, súıikti qyzdarynyń toıyna shashý shashqan halyq ta kóp bolǵan. Alaıda bloger toıǵa túsken qarjyny túgelimen Túrkistan oblysynyń Arys qalasynda salynyp jatqan meshittiń qurylysyna aýdarýdy sheshken.
Sondaı-aq jas jubaılar toıda ata-analaryna, birneshe toı qonaqtaryna Umraǵa qajylyqqa joldama syılady. Belsendi toı qonaqtaryna aqsha men altyn taratqan jas jubaılardyń toı qonaqtarynyń kóńilin barynsha tapqysy kelgenin baıqaýǵa bolady.
Jańasha formatta, saýapty amaldary molynan, erekshe ótken toıdy áleýmettik jeliler de kóp talqylaýda.
Atap óter jaıt sońǵy jyldary toı formatyna ózgeris engizý kerek ekeni, kıilmeıtin kıitter men Qytaıdyń maıda shúıdesiniń saýdasyn júrgizip, toıda toı tabaq retinde taratpaý, jınalys bolyp ótetin toılardy yqshamdaý jaıy jıi aıtylǵanymen qolǵa alynbaı kele jatqany shyndyq. Múldem basqa formatta ótken toıǵa qarap toı ıeleri qalasa toı qonaqtarynyń ózgeriske daıyn ekenin baıqadyq!
Eń bastysy jas jubaılardyń qıǵan nekesi haıyrly, Murat pen Balhııa baqytty bolǵaı!
