Kez kelgen máselege qatysty sheshim qabyldarda qoǵamdyq pikir men kózqarasty mindetti túrde eskerý mańyzdy. Bul týraly kezekti apparattyq keńeste Jambyl oblysynyń ákimi Nurjan Nurjigitov aıtty.
Memleket basshysy Qasym-Jomart Toqaevtyń «Halyq únine qulaq asatyn» tujyrymdamasyna sáıkes basqosýda aldymen jergilikti atqarýshy organdardyń halyqpen keri baılanys máselesi qaraldy. Oblys ákiminiń keńesshisi Nurmýhammed Nııazbekov, baspasóz qyzmetiniń jetekshisi Danııar Asqaruly, «Jambyl oblysy biryńǵaı dıspetcherlik qyzmeti» KMM-niń basshysy Baqkeldi Tursynbek baıandama jasady. Olar áleýmettik jelidegi basshylardyń belsendiligi, kóterilgen saýaldar men ótinishterge jaýap berý deńgeıi, atqarylǵan jumystardy kórsete bilýi, keri baılanys ornatý máselelerine jan-jaqty toqtalyp, alty aıdyń qorytyndysyn baıandady.
Kemshilikter boıynsha birqatar ákimder men olardyń orynbasarlaryna, basqarma basshylaryna qatysty sharalar qabyldanatyn boldy.
- Kez kelgen ózekti máselege qatysty sheshim qabyldaıtyn kezde qoǵamdyq pikirmen, halyqpen sanasý kerek. Olardyń oı-usynys
taryn eskergen durys. Sonda ǵana túsinbestik, narazylyq týyndamaıdy.
Biz ózimizdiń atqaryp jatqan jumystarymyzdy jan-jaqty kórsetip, halyqqa durys aqparat berýge tıispiz. Turǵyndardyń ótinishteri men saýaldaryna ýaqytyly ári sapaly jaýap berýge den qoıyńyzdar. Áli de bolsa osy baǵyttaǵy jumystardy kúsheıte túsý mańyzdy,-degen Nurjan Nurjigitov jaýaptylarǵa naqty tapsyrmalar júktedi.
Keńestiń kún tártibindegi ekinshi másele boıynsha oblys aýmaǵynda júrgizilip jatqan qurylys jumystarynyń barysy qaraldy.
Qurylys basqarmasynyń basshysy Erlan Orynbaevtyń aıtýynsha, búginde 205 joba júzege asýda. Onyń 52-i keler jylǵa ótpeli bolsa, 153-i aǵymdaǵy jyl sońyna deıin tapsyrylýy tıis.
Basqarma basshysy jobalardy ár sala boıynsha taldap, keıbir ózekti máselelerdi ashyp kórsetti.
Oblys ákimi barlyq jobalar boıynsha belgilengen kestedegi merzimniń qatań saqtalýyn jáne qurylystyń sapasyn baqylaý – basty nazarda bolý kerektigin basa aıtty.
- Barlyq nysandardaǵy qurylystar ýaqytyly aıaqtalýy tıis. Jańa oqý jylynda paıdalanýǵa beriletin mektepter 20 tamyzǵa deıin tapsyrylyp, qyrkúıekke deıin tolyq daıyn bolǵany durys.
Qurylystyń sapasyna barynsha nazar aýdaryńyzdar. Baqylaý qatań bolýy kerek.
Budan bólek, bıýdjet qarajatyn únemdi ıgerýge kóńil bólińizder. Uqsas jobalarǵa biryńǵaı baǵa saıasatyn ustaný mańyzdy,-dedi aımaq basshysy.
Jıynda oblys aýmaǵyndaǵy kópqabatty turǵyn úıler qurylysy, «Asarlatyp úı salý» jobasynyń júzege asý barysy da talqylandy.
- Bos turǵan úılerdi jóndep, jańǵyrtyp, muqtajdarǵa bergen árıne durys. Bul áleýmettik jaýapkershiliktiń negizinde júzege asýy qajet.
Al, «Asarlatyp úı salý» jobasynyń maqsaty bólek. Ol jalpy, turǵyndardy, aýyldyqtardy ıgi iske jumyldyrý, qaırymdylyqqa úndeýge negizdelgen. Ata-babalarymyzdyń asar dástúri boıynsha kópshilik birlesip, baspanaǵa muqtaj týystary men aýyldastaryna arnap úıdiń qurylysyn júrgizedi. Ony kórip ósken jas urpaq ta úlken taǵylymdy tárbıe alady,-dedi oblys ákimi.
Sondaı-aq, jeke turǵyn úı qurylysy úshin beriletin jerlerge ınjenerlik-ınfraqurylym tartý sharalary, qurylys jumystarynyń sapasyna jospardan tys júrgizilgen tekseristerdiń qorytyndylary saralandy.
Aımaq basshysy jumystardy utymdy uıymdastyra almaı otyrǵan basshylardy synǵa alyp, óz jaýapkershiligine nemquraıly qaraıtyn merdigerlerge tıisti sharalar qoldaný kerektigin eskertti.
