Baltash Tursymbaevtyń qazasy barsha qazaqqa aýyr soqty desek artyq emes. QR Parlamenti Májilisiniń depýtaty Qazybek Isa da estelikterimen bólisip, facebook paraqshasyna áserli jazba qaldyrdy.
Kórnekti memleket jáne qoǵam qaıratkeri Baltash Tursymbaı aǵamyz da dúnıeden ótti degen sýyq habar jetti…
Qazaq saıasatyndaǵy qaraǵaıǵa qarsy bitken butaqtaı qaısar qaıratkerlerdiń biregeıi edi Baltash aǵamyz!..
Byltyr ǵana kúzde mereıli jasy - jemisti 75 jasymen quttyqtaý jazyp edik…
Memleket jáne qoǵam qaıratkeri, aýyl sharýashylyǵynyń aıtýly arysy, sańlaq saıasatker Baltash aǵamyzdyń zor qarymy men iskerlik darynyn bılik, ıaǵnı memleket jetkilikti paıdalanýy kerek edi. Bılikte júrse de, eldiń qamy úshin qasqaıyp turyp, shyndyqty aıtyp júrdi. Ádettegideı ádilin aıtqandar sekildi ornynan ketken soń, aýylsharýashylyǵy arpa men bıdaıdy aıyra almaıtyn asfaltta ósken kommersanttardyń qolyna túsken edi… Aqyry ne bolǵanyn azyq-túliktiń basym bóligin shetelden satyp alyp, aýadan basqasynyń bári qymbattap, qıyndyq qyspaǵynda otyrǵanymyzǵa qarap bile berińiz…
Men qalaı parlamentke bardym, aspandaǵy ǵaryshta bir másele bolsa da, oǵan jerdegi Qazybek Isa kináli dep jamandaı jóneletin jaldamaly jalaqorlar tobyry paıda boldy. Kádimgi attary shtatta tirkelgen, buıryq boıynsha birinen soń biri shyǵyp turady kezekterimen... Byltyr kóktemde solardyń biri, Baltash aǵamyzǵa ótirik “ini” bolyp júrgen bir paqyr kamerasyn alyp jetip baryp, shatyp-butyp suraqtar qoıyp jatty da, aı-shaı joq, taqyrypqa qatysy joq men týraly pikir surap, jat ta kep jamandasyn…
Sonda Baltash aǵamnyń susty qalpymen arandatýshynyń aqymaq suraǵyn qaıtaryp tastap, aqıqatyn aıtqan úlken azamattyǵyna, eshqandaı buryn aralasyp kórmegen men týraly izgi lebizine bek rıza boldym.
Aqıqatyn aıtatyn Ádildigi týraly áńgimeniń bári rastyǵyna kýá boldym.
Baltash aǵamyzdyń “EL men JER” úshin ter men sher tógip júrgen zor eńbegin el jaqsy biledi. Arysynyń nar tulǵasy halqynyń esinde erekshe asqaqtaı beredi.
Baltash aǵamyz tereńnen oılap, alysqa qaraıtyn, tarıhty da ádil tarazylaı biletin zııaly tulǵa edi. Anaý bir jyldary jergilikti ákimder Túrkistanǵa Aqsaq Temirdiń eskertkishin ornatpaq bolǵanda Baltash Tursymbaı: “Altyn Ordanyń qulaýyna úles qosqan bıleýshiniń eskertkishi Altyn Ordanyń murager eli Túrkistanda turýǵa laıyq emes”-dep toqtatyp tastaǵan degen habar estip, razy bolǵan edik.
Baltash aǵamyzdyń otbasyna, týǵan-týystaryna, qaıratkerin qabyrǵasy qaıysa joqtap jatqan qalyń qazaqqa kóńil aıtamyz!
Alla aldynan jarylqasyn!
Peıishte rýhy shalqı bergeı!
Imany salamat bolsyn!
Qazybek ISA
