Qyzylordada bes ailyq säbi men onyŋ anasyn qaǧyp ketken kölık jürgızuşısı älı ızdestırılıp jatyr, dep habarlaidy «Adyrna» tılşısı.
Qaiǧyly jaǧdai 13 qazan künı bolǧan edı. Zardap şekkender auruhanaǧa jetkızılgen, alaida säbidı aman saqtau mümkın bolmady. Al balanyŋ anasy auyr jaraqat alǧan. Densaulyq saqtau basqarmasynyŋ mälımetınşe, äieldıŋ bas süiegı, qabyrǧalary, būǧana, jambas süiekterı men tobyǧy synǧan.
Qyzylorda oblysynyŋ polisiia departamentı küdıktını qamauǧa aluǧa sot sanksiia bergenın habarlady. Alaida äzırge onyŋ qaida ekenı anyqtalmaǧan, ızdestıru jūmystary jalǧasyp jatyr.
«Küdıktınıŋ ornalasqan jerın anyqtau üşın polisiia departamentınıŋ bükıl jeke qūramy baǧdarlandy. Barlyq küş pen qūral jūmyldyryldy. Tergeu erekşe baqylauǧa alyndy», – delıngen habarlamada.
