Qazaqstandyq mänerlep syrǧanauşy Mihail Şaidorov 2026/27 mausymyndaǧy Gran-pri seriiasynyŋ Fransiianyŋ Anje qalasynda ötken alǧaşqy kezeŋındegı jarysyn aiaqtady, dep habarlaidy «Adyrna» tılşısı Olympic.kz-ke sılteme jasap.
Ekı künge sozylǧan jarysta otandasymyz 206,55 ūpai jinap, onynşy orynǧa tūraqtady.
Qysqa baǧdarlamada Mihail Şaidorov törtınşı nätije körsetken edı. Alaida erkın baǧdarlamada 11-orynǧa ie bolyp, jalpy esepte üzdık bestıktegı ornyn saqtap qala almady.
«Mūndai sätsız bastamamnan keiın ne aitarymdy bılmeimın. Keide bärı bız qalaǧandai bola bermeidı. Mūz taiǧaq. Sızderdıŋ alaŋdauşylyqtaryŋyzdy sezıp, jazǧan habarlamalaryŋyzdy oqyp otyrmyn. Qoldau bıldırgen ärqaisyŋyzǧa şyn jürekten alǧys aitamyn. Menı tek jeŋısterımde ǧana emes, jeŋılısterımde de qoldap jürgenderıŋız üşın raqmet. Öitkenı jeŋılıs te — osy joldyŋ bır bölıgı. Berılmei, būrynǧydan da myqty bolyp oraluǧa uäde beremın. Barşaŋyzǧa raqmet!» — dep jazdy otandasymyz Instagram paraqşasynda.
284,24 ūpai jinaǧan Fransiia ökılı Adam Siao Him Fa jeŋımpaz atandy. Japoniia sportşysy Kao Miura 247,96 ūpaimen kümıs jüldege ie bolsa, Oŋtüstık Koreia ökılı Minkiu So 244,90 ūpaimen üzdık üştıktı tüiındedı.
Aita keteiık, Fransiiadaǧy jarys 2026/27 jylǧy mausymda ötetın Gran-pri seriiasynyŋ alty kezeŋınıŋ alǧaşqysy boldy.
