Foto:ŪOK
Qazaqstandyq boksşy Törehan Sabyrhan 70 kelıge deiıngı salmaq därejesınde 2026 jylǧy Aziia oiyndarynyŋ chempiony atandy. Finaldyq kezdesude ol İordaniia ökılı Zeiad İşaişpen jūdyryqtasty, dep habarlaidy "Adyrna".
Jekpe-jek bastalmai tūryp-aq ekı sportşy arasynda emosiialyq jaǧdai baiqaldy. İordaniialyq boksşy qazaqstandyqty keudesınen iterıp jıberdı. Al gong soǧylǧannan keiın qarsylastar alǧaşqy sekundtardan-aq belsendılık tanytyp, ring ortasynda soqqy almasuǧa kırıstı.
Bırtındep Sabyrhan araqaşyqtyqty tiımdı paidalana bastady. Boiynyŋ ūzyndyǧyn ūtymdy qoldanǧan qazaqstandyq orta qaşyqtyqtan şabuyl jasap, qarsylasyna mümkındık bermedı. Bırınşı raundtyŋ qorytyndysynda töreşıler jeŋıstı bırauyzdan Sabyrhanǧa berdı.
Ekınşı raundta İşaiş taktikasyn özgertıp, jekpe-jektı jaqyn qaşyqtyqta ötkızuge tyrysty. Ol qazaqstandyqty arqanǧa yǧystyrǧanymen, Sabyrhan qarsy şabuyldar arqyly qysymnan şyǧa bıldı. Raundtyŋ soŋyna qarai qazaqstandyq bastamany tolyq öz qolyna alyp, belsendı şabuylǧa köştı. Būl kezeŋde de töreşıler onyŋ basymdyǧyn moiyndady.
Üşınşı raundta Sabyrhan qarqynyn tömendetpei, qarsylasyna bırınen soŋ bırın däl soqqylaryn baǧyttady. Huktar men jyldam kombinasiialardy sättı paidalanǧan qazaqstandyq İşaiştyŋ şabuyldarynan da qorǧana bıldı.
Osylaişa üş raundtyŋ nätijesı boiynşa Törehan Sabyrhan töreşılerdıŋ bırauyzdy şeşımımen jeŋıske jetıp, Aziia oiyndarynyŋ altyn medalın ielendı. Būl Qazaqstan qūramasynyŋ qorjynyna tüsken onynşy altyn jülde boldy. Sondai-aq Sabyrhan ūlttyq qūramanyŋ bokstan osy turnirdegı alǧaşqy joǧary därejelı medalın jeŋıp aldy.
Būǧan deiın Törehan Sabyrhan şirek finalda Özbekstan ökılı Şavkatjon Boltaevty 5:0 esebımen jeŋgen edı. Kezdesu barysynda qazaqstandyq boksşy şabuylda belsendılık tanytyp, qarsylasynyŋ soqqylaryna jol bermedı.
Törehannyŋ aǧasy Mahmūd Sabyrhan da jarysta jüldege qol jetkızdı. Ol jartylai finaldan keiın qola medal ielendı. Alaida onyŋ jeŋılısıne qatysty töreşıler şeşımı dau tudyrǧan. Qazaqstan boks federasiiasynyŋ ökılderı būl şeşımmen kelıspeitının mälımdedı.
Aita keteiık, bügın Qazaqstan qūramasynyŋ kapitany Aibek Oralbai da finaldyq jekpe-jegın ötkızedı. Ol Aziia oiyndarynyŋ altyn medalı üşın özbekstandyq Jahongir Zokirovpen kezdesedı.
