26 qyrküiekte Türkıstan oblysy Sozaq audanynda tolyq jaŋǧyrtudan ötken Baba Tüktı Şaşty Äzız kesenesı saltanatty türde aşyldy. Eldıŋ ruhani tarihynda erekşe orny bar qasiettı nysandy qalpyna keltıru jobasyn Timur Qūlybaevtyŋ Halyk qaiyrymdylyq qory jüzege asyrdy.
Jobaǧa 330 mln teŋgege juyq qarjy bölındı. Būl - biyl qūrylǧanyna 10 jyl tolǧan Halyk qorynyŋ mereitoi aiasynda jüzege asyrǧan igı bastamalarynyŋ bırı. Qor üşın tarihi-mädeni mūrany saqtau - ötkenge taǧzym etumen qatar, ony keler ūrpaqqa aman jetkızuge baǧyttalǧan maŋyzdy mındetterdıŋ bırı.
Jiyn kesene tarihy men ony qaita jaŋǧyrtu barysy turaly tanystyrylymnan bastaldy. Odan keiın jaŋartylǧan nysannyŋ lentasy qiylyp, qonaqtar kesene aumaǧyn aralady. Auyl aqsaqaldary eldıŋ amandyǧyn, ūrpaqtyŋ bırlıgın tılep, bata berdı.
«Baba jatqan jerdı qadırleu - ötkendı ǧana qūrmetteu emes, öz tamyryŋdy tanu. Osyndai oryndar bütın tūrsa, eldıŋ jady da bütın bolady. Bügıngı ıstıŋ berekesı artsyn, būl jerge kelgen är adamnyŋ nietı qabyl bolsyn, el aman, jūrt tynyş bolsyn», – dep bata berdı auyl aqsaqaldarynyŋ bırı.
Qūmkent auylynan oŋtüstıkke qarai üş şaqyrym jerde ornalasqan Baba Tüktı Şaşty Äzız kesenesı - Sozaq öŋırınıŋ tarihymen bıte qainasqan qasiettı oryndardyŋ bırı. Kesenenıŋ alǧaşqy nysany XVIII ǧasyrdyŋ ortasynda boi kötergen. Al onyŋ keiıngı säulettık kelbetı XIX ǧasyrdyŋ aiaǧy men XX ǧasyrdyŋ basynda qalyptasqan. Bügınde Baba Tüktı Şaşty Äzız kesenesı «Qazaqstannyŋ kielı jerlerınıŋ geografiiasy» aiasynda eldegı 100 ūlttyq qasiettı nysannyŋ qataryna engen.
Halyk qorynyŋ Atqaruşy direktory Ǧalymbek Jaqsylyqov tarihi mūrany saqtau tek ötkenge taǧzym etu emes, keleşek aldyndaǧy jauapkerşılık ekenın atap öttı.
«Mūndai qasiettı oryndardyŋ qadırı onyŋ qabyrǧasymen ǧana ölşenbeidı. Mūnda halyqtyŋ jady, eldıŋ tarihy, bırneşe buynnyŋ taǧdyry jatyr. Sondyqtan bızdıŋ maqsatymyz kesenenı jöndep qana qoiu emes, onyŋ tarihi bolmysyn saqtap, keler ūrpaqqa laiyq küide jetkızu boldy. Bügın sol ıstıŋ nätijesın elmen bırge körıp otyrmyz», – dedı Ǧalymbek Jaqsylyqov.
Joba aiasynda kesenenıŋ özımen qatar ainalasyndaǧy infraqūrylym da jaŋartyldy. Qonaqüi, ashana jäne kesene qarauşysynyŋ üiı jöndelıp, ziiaratşylar men qonaqtarǧa qolaily jaǧdai jasaldy.
Memleket jäne qoǧam qairatkerı Düniejüzı qazaqtary qauymdastyǧy töraǧasynyŋ bırınşı orynbasary Zauytbek Qauysbekūly Baba Tüktı Şaşty Äzız kesenesınıŋ jaŋǧyruy – tarihi mūraǧa degen qūrmettıŋ körınısı ekenın atap öttı.
«Baba Tüktı Şaşty Äzız – halqymyzdyŋ ruhani jadynda erekşe orny bar qasiettı tūlǧa. Osyndai tarihi oryndardy jaŋǧyrtyp, keler ūrpaqqa aman jetkızu – barşamyzǧa ortaq mındet. Bügın qasiettı kesenenıŋ jaŋaryp, el igılıgıne berıluı – ötkenımızge degen qūrmettıŋ, ūlttyq qūndylyqtarymyzǧa degen janaşyrlyqtyŋ belgısı. Osy igı ıske atsalysqan azamattarǧa, qoldau körsetken Halyk qaiyrymdylyq qoryna alǧysymdy bıldıremın», – dedı Zauytbek Tūrysbekūly.
Mädeniet jäne aqparat ministrlıgı kesenenı 2026 jylǧy ǧylymi-restavrasiialyq josparǧa engızgen. Qalpyna keltıru jūmystary akkredittelgen kompaniia äzırlegen jäne Türkıstan oblysynyŋ mädeniet basqarmasymen kelısılgen qūjattama negızınde atqaryldy.
Anyqtama
2016 jyly Timur jäne Dinara Qūlybaevtar qūrǧan Halyk qaiyrymdylyq qoryna biyl 10 jyl tolyp otyr. Osy uaqyt ışınde qor bılım, sport, mädeniet, ekologiia jäne äleumettık qoldau baǧyttarynda 100 mlrd. teŋgege 200-den astam jobany jüzege asyrdy. Baba Tüktı Şaşty Äzız kesenesın jaŋǧyrtu qordyŋ tarihi mūrany saqtauǧa baǧyttalǧan ırı jobalarynyŋ bırı.
