Qyrküiektıŋ soŋǧy jeksenbısı – Qazaqstanda Eŋbek künı. Qala tazalyǧyn qolmen atqaratyn adamdardyŋ eŋbegı qanşalyqty baǧalanyp jür? Olardyŋ tynys-tırşılıgı qandai, keiıpker söileidı.
Är taŋ saiyn qala tūrǧyndary jyly üiınen şyǧyp, taza köşelermen jūmysqa, sabaqqa barady. Būl kündelıktı qarapaiym körınıs bolǧanymen, osy tazalyqtyŋ artynda taŋ atpai eŋbekke kırısetın jandar bar. Solardyŋ bırı – Gülnar Nūrmyşeva.
Keiıpkerımız – 1969 jyly Ereimentau audanynyŋ tumasy. Gülnar Nūrmyşeva – ekı balanyŋ anasy, bügınde nemerelerınıŋ süiıktı äjesı. Tazalyq salasynda 30 jylǧa juyq eŋbek etıp kele jatqan maman qazır Astana qalasy Saryarqa audanynda qolmen jinau şeberı bolyp jūmys ısteidı.
Ol Astanaǧa 1986 jyly student bolyp kelgen. Sol uaqyttan berı elordada tūryp keledı.
– Men ömır boiy mūǧalım boludy armandaǧanmyn. Alǧaş student bop, 1986 jyly kelgende jas boldyq pa, bılmeimın. Sol kezde janyma erıp kelgen qyzdar oquǧa tüse almai, men de oqudan şyǧyp ketkenmın. Keiın tehnikumǧa baryp, satuşy mamandyǧyn taŋdap, sol jaqta oqydym.
– Qazır «Astana tazalyqta» jūmys ısteisız. Qai jyly ornalastyŋyz, atqaratyn qyzmetıŋız qandai?
– Negızı būl salada 1999 jyldan bastap jūmys ısteimın. Kezınde «Gorkomhoz» bolatyn. Sosyn ol mekeme bankrot bolyp, jabyldy. 2008 jyldyŋ 1 qazanynda «Astana tazalyq» aşylyp, sol sätten berı osy mekemede jūmys ıstep kelemın. Qazır qolmen jinau şeberımın.
– Eŋ alǧaş tura 28 jyl būryn eŋbek jolyŋyzdy bastaǧan ekensız. Sol kezderdı eske alaiyqşy.
– Ol kezde jol jūmysşysy bolyp jūmys ıstegenmın. Köşe de sypyrdym. Sodan, mümkın menıŋ eŋbegımdı baǧalaǧan şyǧar, brigadir boldym. Odan osy qolmen jinau şeberı bolyp köterıldım. Odan basqa da ülken qyzmetterdı ūsyndy. Bıraq, men barmadym. Öitkenı qazır ıstep jürgen jūmysym özıme ūnaidy, janyma jaqyn.
– Bas qalanyŋ tazalyǧyna jauap beretın mamansyz. Jūmysyŋyzdyŋ qandai qiyndyqtary bar?
— Bızdıŋ jūmystaǧy eŋ qiyn jaǧdai – qoǧamda bızdıŋ eŋbegımızdıŋ baǧalanbauy. Bızdıŋ eŋbegımızdı keibır jūrt syilamaidy. Bırde mynadai jaǧdai boldy. Mektep oquşysy, tüskı auysymnan şyqty. Bır er bala qolyndaǧy bötelkenı bızde jūmys ısteitın ülken apaidyŋ aldyna laqtyryp, jerge syndyrdy. Artynşa kelıp «Jina, mynau senıŋ jūmysyŋ, jalaqyŋ», – deidı. Däl solai aitty. Sol kezde balanyŋ äkesı kelıp «Mynau senıŋ anaŋnan da ülken adam, adamnyŋ eŋbegın baǧalap üiren», - dep ūrysyp berdı. Keiın sol bötelke qaldyǧyn balasyna jinatty. Osyndai sätter este saqtalyp qalady. Bız tazalyq ıstep jürıp, talai jaǧdaidy bastan ötkızemız. Bırer adam jaqsy qarap, bata berıp jatsa, bıreulerı kerısınşe ūrsyp jatady.
— Astana tūrǧyndary men qonaqtarynyŋ ötken jyldar men bügıngı uaqyttaǧy tazalyqqa degen közqarasyn qalai baǧalar edıŋız?
— Alysqa barmai, 2005, 2006, 2010 jyldarmen salystyrǧanda, qazır tazalyqqa jaqsy qaraidy. Öitkenı būryndary bızdıŋ eŋbektı de baǧalamaityn, özderı de tazalyqqa qaramaityn. Ötken jyldary jolda kele jatyp qaǧazdaryn, qoldaryndaǧy susyn bötelkesın tastai salatyn. Tıptı, şemışke şaǧyp, otyrǧan jerlerınde de lastaityn.
Keiın aiyppūldar salyp bastady ǧoi. Tükırıp, qoqys tastaǧany üşın türlı aiyppūl arqalap jatty. Astanalyqtar qazır köp tazalyqqa köŋıl böletın boldy. Köşege qoqys tastaityndar azaidy. Bıraq bes sausaq bırdei emes. Älı de arasynda qoqysyn tastap, bızge «jinaŋdar» dep aitatyndar kezdesedı. Adam balasy ärtürlı ǧoi.
– Taŋerteŋ jūmysqa kele jatqanda ne oilaisyz? Sony aityŋyzşy
– Taŋerteŋ jūmysqa kele jatqanda... şynymdy aitaiyn, qysta alaŋdaimyn. Qystyŋ künı bügın jol qalai eken, ärıptesterdıŋ bärı jūmysqa kele ala ma, kele almai qala ma, oŋyp qala ma, avtobustardyŋ ışı jyly ma eken, qalai kele jatyr eken dep oilaimyn. Bızdıŋ auysymdarda arnaiy kölık bolady. Avtobus üiden äketedı. Men üiden taŋǧy 04:00-de şyǧamyn. Şynymdy aitsam, tek şeber emes, sol jūmysta brigadir, medisina mamany, bärınıŋ jaǧdaiyn oilap jüremın.
- Salada eŋbek etıp jürgenıŋızge 28 jyldan asypty. 28 jyl degen bır adamnyŋ ǧūmyryndai uaqyt. Osy aralyqta eŋbegıŋız elendı me, marapattaldyŋyz ba?
– Baǧalandy. Qalanyŋ äkımderınen talai diplomdar alyp jatyrmyn, ministrden de aldym. Prezidentımız Qasym-Jomart Toqaevtan Konstitusiia künıne orai medal da aldym.
– Qūpiia bolmasa, jalaqy men jūmys kesteŋız turaly aityŋyzşy.
– Qūpiia eşteŋesı joq. Bızde üş auysym jūmys ısteidı. Bırınşı auysym taŋǧy 06:00-den 15:00 deiın. Ekınşı auysym 15:00-den 23:00 deiın. Üşınşı auysym 20:00-den taŋǧy 05:00 deiın. Menıŋ jalaqym – 320-330 myŋ teŋge.
– Jūmys kesteŋızdı bıldık. 8-9 saǧat syrtta jürıp, jūmys ısteisız. Al jūmystan tys uaqytta nemen ainalysasyz?
– Bızdıŋ jūmys qauyrt, jüikenı jūqartady. Men üige kelgende eŋ bırınşı juynuǧa jügırmeimın. Aldymen muzyka qoiamyn da, bileimın. Sol arqyly jüikemdı tynyştandyramyn. Sosyn juynyp, tamaq jasauǧa kırısemın.
Būryndary toqymamen ainalysatyn edım. Kompiuter degen köz janardy qūrtty. Arasynda tıgınmen ainalysatynym da bar. Kıtap oqyǧandy ūnatamyn. Psihologiia janryndaǧy kıtaptardy köp oqimyn.
– Jūmystan tys uaqytta da ärıptesterıŋızben aralasyz ba?
– Menıŋ tiktokta 2500-dai jazyluşym bar. Bilep, türlı video tüsıremız. Är mereke, jiyndarda brigada bolyp jinalyp, köŋıl köteremız.
– Qala taza boluy üşın halqy men tūrǧyndaryna ne aitar edıŋız?
– Astananyŋ tūrǧyndary men qonaqtaryna aitarym, tazalyqty saqtau kerek. Tazalyq adamnyŋ özınen bastalady. Sosyn, bız siiaqty tazalyqpen ainalysatyn adamdardyŋ eŋbegın baǧalasa eken deimın.
- Aşyq äŋgımeŋız üşın köp raqmet!
Symbat Nauhan
«Adyrna» ūlttyq portaly
