Resei prezidentı Vladimir Putinnıŋ Sochidegı «Bocharov ruchei» memlekettık rezidensiiasynyŋ aumaǧynda auqymdy qūrylys jūmystary jürgızılıp jatyr, dep habarlaidy "Adyrna".
BBC mälımetınşe, jaŋa nysandardyŋ qūrylysy Resei Federasiiasynyŋ federaldyq küzet qyzmetınıŋ (FQQ) memlekettık qorǧanys tapsyrysy aiasynda jüzege asyryluda.
Basylymnyŋ habarlauynşa, rezidensiia aumaǧyndaǧy eskı ǧimarattardy būzu jūmystary 2024 jyly bastalǧan. 2025 jyldyŋ qyrküiegıne qarai olardyŋ ornynda ülken qazanşūŋqyr paida bolǧan. Bilık ǧimarattardyŋ būzylǧany nemese onyŋ sebepterı turaly resmi aqparat taratpaǧan.
BBC zerttegen sputniktık suretterge säikes, 2026 jyldyŋ küzıne qarai aumaqta jaŋa ǧimarattardyŋ şatyrlary körıne bastaǧan. Jaŋa qūrylystyŋ aumaǧy būrynǧy nysandardan da ülken ekenı baiqalady. Alaida sputniktık suretter arqyly ǧimarattardyŋ naqty maqsaty men qabat sanyn anyqtau mümkın emes.
BBC jaŋa qūrylysqa qatysty memlekettık kelısımşart turaly aqparatty sot şeşımderınıŋ bırınen anyqtaǧan. Qūjatta jūmys «Resei FQQ-nyŋ «Bocharov ruchei» nysandaryn salu jäne qaita jaŋǧyrtu» dep körsetılgen. Kelısımşart 2023–2027 jyldarǧa eseptelgen.
Basylymnyŋ mälımetınşe, jobanyŋ bas merdıgerı retınde Qyrymda tırkelgen «Transstroiinvest» kompaniialar toby jūmys ısteidı. Kompaniianyŋ atauy «Bocharov ruchei» aumaǧynda jūmys jürgızgen bırneşe qosalqy merdıgermen bolǧan sot daularynda kezdesedı.
Qūrylys jūmystaryna jūmysşylar ǧalamtordaǧy habarlama arqyly da tartylǧan. Habarlandyrularda nysannyŋ küzetı küşeitılgen aumaqta ornalasqany, jūmysşylardyŋ qūjattary tekserıletını jäne arnaiy rūqsat qajet ekenı jazylǧan.
2025 jyly monolitşıler, betonşylar, tas qalauşylar men armaturşylar ızdelgen. Keibır habarlandyrularda nysannyŋ atauy tıkelei körsetılse, keibırınde onyŋ «strategiialyq» jäne «jabyq» nysan ekenı ǧana aitylǧan.
2026 jyly qūrylys mamandaryna arnalǧan habarlama sipaty özgerıp, ǧimarattardyŋ ışkı ärleu jūmystaryna, sonyŋ ışınde jaryqtandyru jüiesın jäne esıkterdı ornatatyn mamandarǧa sūranys artqan.
BBC jaŋa keşennıŋ jalpy qūny äzırge belgısız ekenın jazady. Basylym anyqtaǧan jekelegen merdıgerlık jūmystardyŋ qūny 90 millionnan 500 million rublge deiın bolǧan.
«Bocharov ruchei» — Sochi qalasynda ornalasqan Resei prezidentınıŋ resmi memlekettık rezidensiiasy. BBC mälımetınşe, jaŋa qūrylys jūmystarynyŋ naqty qandai nysandardy qamtityny jäne keşennıŋ tüpkılıktı qandai maqsatta paidalanylatyny äzırge aşyq jariialanbaǧan.
