Reseidıŋ Ukrainaǧa qarsy soǧysy aiaqtaluǧa jaqyn. Mūndai pıkırdı Türkiianyŋ Syrtqy ıster ministrı Hakan Fidan A Haber telearnasyna bergen sūhbatynda aitty, dep habarlaidy "Adyrna" portaly «Anadolu» agenttıgıne sılteme jasap.
Ministrdıŋ aituynşa, soǧystyŋ alǧaşqy kezeŋınde ony toqtatudy qalamaǧandar bolǧan, alaida qazır olardyŋ da közqarasy özgerıp keledı.
«Mūndai küşter boldy, sondyqtan soǧys üş-tört jylǧa sozyldy. Bıraq endı ony aiaqtaudy qalamaǧandar da basqaşa oilai bastady», – dedı ol.
Fidannyŋ sözınşe, Europa basşylary da osy pıkırge kele bastaǧan.
«Ankaraǧa kelgen Ūlybritaniia premer-ministrı men Germaniia kanslerı de prezident Erdoǧanmen kezdesude osy mäselenı köterdı. Menıŋ oiymşa, būl soǧys toqtau nüktesıne eŋ jaqyn sätınde tūr», – dedı Türkiianyŋ syrtqy ıster ministrı.
Ministr qazır soǧys «tozdyru soǧysyna» ainalǧanyn, mūnda eşkım naqty jeŋıske jete almaitynyn, kerısınşe ekı tarap ta adam şyǧyny, qarjylyq jäne saiasi tūrǧyda öte ülken zardap şegıp jatqanyn aitty. Sol sebeptı beibıt kelıssözder – uaqyt talaby.
«Būl soǧys eŋ auyr kezeŋın bastan ötkerude dep oilaimyn. Sebebı ekı tarap ta bır-bırınıŋ kölık jäne energetikalyq infraqūrylymyn joiuǧa küş salyp jatyr. Tyǧyryqqa tırelgen jaǧdai qalyptasty. Eşkım alǧa jylji almaidy, jaǧdai özgermei tūr. Soǧys aiaqtaluy tiıs. Bız kelıssözderdıŋ sözsız ekenın tüsınemız», – dedı ol.
Fidan Europa resmi türde soǧysqa qatyspaǧanymen, onyŋ äskeri jäne qarjylyq qoldauy qaqtyǧystyŋ bır bölıgıne ainalǧanyn atap öttı. Onyŋ aituynşa, soǧysqa ketetın şyǧyn bılım, medisina, infraqūrylym siiaqty salalardyŋ qarjysyn azaityp, salyqtyŋ ösuıne jäne halyq narazylyǧyna äkelıp otyr.
Türkiia syrtqy ıster ministrı diplomatiia älı de basty qūral ekenın aityp, beibıt platforma qūruǧa bolatynyna senım bıldırdı.
«Bız beibıt platforma qūrylady dep senemız. Jeke özım senemın. Ol Türkiiada nemese basqa jerde boluy mümkın, bıraq beibıt kelısım tek qajet emes, sonymen bırge mındettı dep esepteimın. Ökınışke qarai, tüsınıktı sebepterge bailanysty barlyq mälımettı aita almaimyn, bıraq būl oryn alady dep senemın», – dedı Fidan.
Biyl köktemde üş jyl üzılısten keiın Resei men Ukraina AQŞ-tyŋ araaǧaiyndyǧymen tıkelei kelıssözderdı jandandyrǧan edı. Stambulda üş raund öttı, taraptar tūtqyndar men qaza tapqandardyŋ denelerın almasu turaly kelısken. Alaida jaŋa raundtar äzırge belgılengen joq.
