Däulet Bekmanov Qorǧanys ministrınıŋ orynbasary qyzmetıne taǧaiyndaldy. Būl turaly 24 qyrküiekte Aqordanyŋ baspasöz qyzmetı jazdy, dep habarlaidy «Adyrna» tılşısı.
«Memleket basşysynyŋ ökımımen Däulet Nysanqūlūly Bekmanov Qazaqstan Respublikasy Qorǧanys ministrınıŋ orynbasary lauazymyna taǧaiyndaldy»,– delıngen habarlamada.
Däulet Bekmanov 1983 jyly Özbekstan Respublikasynyŋ Dostyq qalasynda düniege kelgen. 2004 jyly «Miras» universitetın, 2010 jyly M.Äuezov atyndaǧy Oŋtüstık Qazaqstan memlekettık universitetın tämamdaǧan.
Eŋbek jolyn 2005 jyly jeke kompaniiada injener-jüie tehnigı bolyp bastaǧan. 2006–2011 jyldary memlekettık jäne kommersiialyq ūiymdarda türlı qyzmet atqardy. 2011 jyldan memlekettık qyzmetke kelıp, Bailanys jäne aqparat ministrlıgınde, Kölık jäne kommunikasiia ministrlıgınde, Bailanys jäne aqparat agenttıgınde, İnvestisiialar jäne damu ministrlıgınde memlekettık qyzmetterdı avtomattandyru men aqparattandyru baǧytyndaǧy basşylyq qyzmetterde eŋbek etken.
2016–2018 jyldary Aqparat jäne kommunikasiialar ministrlıgınde Memlekettık qyzmetterdı damytu departamentı direktorynyŋ orynbasary, keiın Aqparattandyru departamentınıŋ direktory bolǧan. 2018 jyly «Ūlttyq aqparattyq tehnologiialar» AQ basqarma töraǧasynyŋ orynbasary bolyp taǧaiyndalǧan.
2020 jylǧy aqpanda Sifrlyq damu, innovasiialar jäne aeroǧaryş önerkäsıbı ministrlıgınıŋ Memlekettık körsetıletın qyzmetter komitetın basqarǧan. Būl qyzmette 2023 jylǧy mamyrǧa deiın otyrǧan.
Keiın ol qaitadan «Ūlttyq aqparattyq tehnologiialar» AQ-ǧa kelıp, basqarma töraǧasy qyzmetın atqarǧan. 2025 jyly kompaniia direktorlar keŋesınıŋ müşesı bolǧany da resmi qūjattarda körsetılgen.
