Bügın, Almatyda Qala künıne orai Almaly audanyndaǧy «Asyl» sauda ortalyǧynda qalalyq kıtaphanalardyŋ jaŋa kıtap beru punktı aşyldy.
Joba Memleket basşysy Qasym-Jomart Toqaevtyŋ «Oqityn ūlt» jobasy aiasynda qala äkımı Darhan Satybaldynyŋ tapsyrmasy boiynşa jüzege asyryluda. Bastamanyŋ negızgı maqsaty – qala tūrǧyndarynyŋ kıtapqa qoljetımdılıgın arttyru, kıtap oquǧa qyzyǧuşylyǧyn qalyptastyru jäne oqu mädenietın damytu.
Kıtap beru punktınıŋ aşylu saltanatyna Almaly audany äkımınıŋ orynbasary Oljas Qūrmanbekūly, Qazaqstannyŋ eŋbek sıŋırgen qairatkerı Säule Dosjan, Qazaqstan Jazuşylar odaǧynyŋ müşesı, aqyn, jazuşy Beibıt Sarybai, jurnalist, jazuşy Baian Bolathanova, mädeniet salasynyŋ ökılderı jäne qala tūrǧyndary qatysty.
Is-şara barysynda ziialy qauym ökılderı söz söilep, kıtap oqudyŋ qoǧamdaǧy maŋyzyna jäne ädebiettı tūrǧyndarǧa barynşa qoljetımdı etudıŋ özektılıgıne toqtaldy.
Öz qūttyqtau sözınde Qazaqstannyŋ eŋbek sıŋırgen qairatkerı Säule Dosjan kıtap beru punktınıŋ sauda ortalyǧynda aşylu maŋyzdylyǧyn atap öttı:
«Bügın Almaly audanynda tūrǧyndar üşın maŋyzdy ärı qoljetımdı mädeni keŋıstık aşylyp otyr. Kıtaphanany adamdar köp keletın sauda ortalyǧyna jaqyndatu – kıtap oqudy kündelıktı ömır saltyna ainaldyruǧa baǧyttalǧan jaqsy bastama. Osyndai jobalardyŋ köbeiuı tūrǧyndardyŋ kıtapqa degen qyzyǧuşylyǧyn arttyryp, oqu mädenietın damytuǧa öz ülesın qosady dep senemın» - dedı Säule Dosjan.
Būǧan deiın osyndai alǧaşqy kıtap beru punktı «Adem» sauda ortalyǧynda aşylǧan bolatyn. Sauda üiınıŋ käsıpkerlerı men keluşılerınıŋ alǧaşqy künnen bastap «Oqityn ūlt» ideiasynyŋ aiasynda jüzege asyryp jatqan būl bastamaǧa qoldau körsetıp, asa qyzyǧuşylyq tanytuyna bailanysty, qalanyŋ basqa da audandaryndaǧy sauda ortalyqtarynda osyndai kıtap beru punktterın aşu arqyly tūrǧyndardyŋ kıtapqa qoljetımdılıgın arttyru jūmystary jürgızılude.
Sauda ortalyǧynda kıtap punktınıŋ aşylǧanyn mūndaǧy käsıpkerler de jyly qabyldauda.
«Jūmys ornymyzda kıtap punktınıŋ aşylǧanyna quanyştymyn. Osy jerden motivasiialyq jäne salalyq kıtaptardy alyp, käsıbımızdı damytuǧa kömektesetın ädebiettermen tanysatyn bolamyn. Būl bız üşın ülken mümkındık dep oilaimyn. Osyndai igı bastamany qolǧa alǧan Almaty äkımdıgı men qalalyq kıtaphanalarǧa alǧysym şeksız!» – dep atap öttı käsıpker Azamat İnkarov.
Bügınde jaŋa kıtap beru punktınıŋ qorynda 2000-nan astam kıtap bar. Oqyrmandar körkem ädebietten bastap, balalar ädebietı men tanymdyq basylymdarǧa deiıngı türlı kıtaptardy taŋdai alady.
Jaŋa kıtap beru punktı särsenbı–düisenbı künderı saǧat 10:00-den 19:00-ge deiın jūmys ısteidı. Seisenbı – demalys künı.
Almaly audanynyŋ tūrǧyndary men «Asyl» sauda ortalyǧynyŋ keluşılerın jaŋa kıtap beru punktıne kelıp, kıtap qorymen tanysyp, özderıne qajettı ädebietterdı taŋdauǧa şaqyramyz.
