Almaty qalasy Jastar saiasaty basqarmasynyŋ qoldauymen, «Äleumettık şeberhana» jobasy aiasynda, Almaty qalasynyŋ Ortalyq demalys saiabaǧynda, Almaty oblystyq №1 balalar üiınıŋ tärbielenuşılerıne arnalǧan qaiyrymdylyq mädeni-oiyn-sauyq ıs-şarasy ūiymdastyryldy.
Is-şara barysynda balalar Almaty qalasynyŋ Ortalyq demalys saiabaǧynda bolyp, türlı attraksiondarda demalyp, köterıŋkı köŋıl küige bölenıp, jaŋa äserlerge ie boldy. Sonymen qatar qatysuşylarǧa ystyq tüskı as pen tättıler ūsynyldy.
Osy oraida, Almaty qalasynyŋ Ortalyq demalys saiabaǧy balalarǧa jäne halyqtyŋ äleumettık osal toptaryna qoldau körsetuge baǧyttalǧan qaiyrymdylyq jäne äleumettık bastamalardy tūraqty türde qoldap kele jatqanyn atap ötken jön. 2026 jyldyŋ basynan bügıngı künge deiın saiabaqtyŋ qaiyrymdylyq qoldauynyŋ arqasynda tört myŋnan astam bala attraksiondarǧa tegın baru mümkındıgıne ie boldy. Saiabaq osyndai jobalardy jüzege asyru alaŋy retınde qyzmet atqaryp, äleumettık jauapkerşılıktı, qaiyrymdylyq mädenietın damytuǧa, qolaily orta qalyptastyruǧa jäne qoǧamdyq maŋyzy bar ıs-şaralardy ötkızuge öz ülesın qosyp keledı.
Osyndai bastamalar balalardyŋ bos uaqytyn qyzyqty ärı mazmūndy ötkızuge mümkındık berıp qana qoimai, olardyŋ äleumettık beiımdeluıne, tūlǧalyq damuyna jäne jaǧymdy ömırlık täjıribe qalyptastyruyna yqpal etedı.
«Qamqor Charity» qoǧamdyq qorynyŋ töraiymy Baǧdat Anarbaeva mūndai ıs-şaralar qordyŋ ömırlık qiyn jaǧdaiǧa tap bolǧan balalardy qoldau baǧytyndaǧy jüielı jūmysynyŋ maŋyzdy bölıgı ekenın atap öttı.
«Ärbır bala qamqorlyq pen meiırımdı sezınuge laiyq. Keide quanyşqa toly bır künnıŋ özı balaǧa özıne degen senımdılık syilap, ömırge jaŋa közqaraspen qarauǧa mümkındık beredı. “Äleumettık şeberhana” jobasy arqyly bız balalardyŋ jan-jaqty damuyna, äleumettenuıne jäne baqytty balalyq şaǧyn qalyptastyruǧa jaǧdai jasaudy maqsat etemız», - dedı «Qamqor Charity» qoǧamdyq qorynyŋ töraiymy Baǧdat Anarbaeva.
Eske sala keteiık, «Äleumettık şeberhana» jobasy ata-anasynyŋ qamqorlyǧynsyz qalǧan, ömırlık qiyn jaǧdaiǧa tap bolǧan jäne erekşe bılım beru qajettılıkterı bar balalardy qoldauǧa baǧyttalǧan. Jobanyŋ basty maqsaty - olardyŋ äleumettık beiımdeluıne, tūlǧalyq damuyna jäne qoǧam ömırıne belsendı aralasuyna yqpal etu.
