Bügın, 9 şıldede Astanada «Baitaq» Qazaqstan jasyldar partiiasynyŋ V kezekten tys sezı öttı, dep habarlaidy «Adyrna» tılşısı.
Sezd barysynda delegattar partiia Jarǧysyna engızıletın özgerısterdı, sailaualdy platformany jäne Qūryltai sailauyna qatysatyn kandidattar tızımın bekıttı.
Partiia töraǧasy Azamathan Ämırtaev aldaǧy Qūryltai sailauy memlekettık saiasattaǧy ekologiialyq kün tärtıbın küşeituge mümkındık beretının atap öttı.
«23 tamyzda elımız alǧaş ret bır palataly Qūryltaidy sailaidy. Būl – kezektı sailau ǧana emes, prezident bastaǧan memleket tarihyndaǧy jaŋa kezeŋ. Sol jaŋa paraqta mındettı türde «ekologiia» degen söz jazyluy tiıs. Eger ony bız jazbasaq, eşkım jazbaidy»,–dedı ol.
Sezdıŋ negızgı şeşımderınıŋ bırı Qazaqstannyŋ jaŋa Konstitusiiasyna säikes partiia Jarǧysyna özgerıster engızu boldy. Sonymen qatar delegattar «Taza Qazaqstan» tūjyrymdamasynyŋ qaǧidattaryna, jasyl ekonomikany damytuǧa, tabiǧi resurstardy ūtymdy paidalanuǧa jäne ekologiialyq mädeniettı qalyptastyruǧa negızdelgen partiianyŋ sailaualdy platformasyn bekıttı.
Sondai-aq partiia Qūryltai sailauyna 51 kandidat ūsyndy. Olardyŋ qatarynda partiia töraǧasy Azamathan Ämırtaev, Aigül Abdualieva, Eldos Aibekov, Şolpan Ämırova, Sapar Ämırtaev, Bekzat Asqarov, Aslan Baizahanov, Tūrsynbek Baitemırov, Nariman Baubek, Asylbek Baiajūma, Ǧabit Bekahmetov, Marina Derkach, Almaz Jaqyşev, Ardaq Japparova, Abai Dosanov, Beibarys Düisen, Asqar İmanaliev, Aidos İmanbaev, Nūrgül Qadyrbaeva, Serıkqan Qajiev, Baqyt Kametov, Säule Qamytbekova, Alma Qaraş, Elnar Kenjaliev, Roza Kenjebekova, Bekbergen Kerei, Vladislav Kisikov, Andrei Krasnokuskii, Allabergen Qonarbaev, Mūrat Küderinov, Almaz Künǧojin, Erlan Qydyrbaev, Nūrǧali Mamytov, Vladimir Martel, Nazgen Mahambetova, Ruslan Mūratūly, Ūlan Musaev, Berıkhan Nūrǧaliev, Aidos Ordabekov, Altai Ordabekov, Amalbek Ömırtai, Nūrgül Saburova, Tair Saǧymbaev, Samat Sadinov, Aibol Serıkbaev, Aiman Seksenova, Anuarbek Skakov, Almat Tūrtaev, Bolat Tūrtaev, Tamirlan Faizulin jäne Ruslan Ysmatullaev bar.
«Irıkteu qorytyndysy boiynşa partiialyq tızımge 51 kandidat endı. Būl tızım kabinetten kabinetke auysyp jürgen şeneunıkterden qūralmaǧanyn erekşe atap ötkım keledı. Būlar – ört söndırgen, özen-kölderdıŋ jaǧalauyn tazartqan, sailau älı jariialanbai tūryp-aq halyqpen bırge bolǧan ekologter, därıgerler, mūǧalımder, injenerler men erıktıler. Tızımnıŋ üşten bırın äielder men jastar qūraidy. Būl – jai ǧana kvota emes, partiiamyzdyŋ şynaiy kelbetı»,– dedı partiia töraǧasy.
