Trotuarmen jürgen samokatşyǧa arnalǧan aiyppūl mölşerı jariialandy

2026 jyldyŋ 25 tamyzynan bastap elektrsamokatpen trotuarlarda jüruge tyiym salynady, dep habarlaidy “Adyrna” ūlttyq portaly. 

Mäselege qatysty jaŋa zaŋ qabyldandy.

Atalǧan talapty būzǧan azamattarǧa 2 ailyq eseptık körsetkış (8 650 teŋge) mölşerınde äkımşılık aiyppūl qarastyrylǧan.

Elektrsamokattardyŋ jaiau jürgınşılerdıŋ qauıpsızdıgıne qater töndıruıne bailanysty olardy trotuarlardan şyǧaru mäselesı būǧan deiın de qoǧamdyq talqylauda bolǧan. Būl bastama jarty jyl būryn Mäjılıs deputattarynyŋ qarauyna ūsynylǧan edı.

Osyǧan deiın «Jol jürısı turaly» zaŋnyŋ 57-babyna säikes elektrsamokat jürgızuşılerı aldymen velosiped jolymen nemese velosiped jolaǧymen qozǧaluǧa mındettı bolatyn. Eger mūndai joldar bolmasa, olar joldyŋ oŋ jaq jiegımen, qoǧamdyq kölıkke arnalǧan jolaqpen, jol jiegımen nemese jaiau jürgınşılerge qauıp töndırmei, saǧatyna 6 şaqyrymnan aspaityn jyldamdyqpen trotuar arqyly jüruge qūqyly edı.

Jaŋa özgerısterge säikes, trotuarda jüruge rūqsat beretın norma zaŋnan alynyp tastaldy. Zaŋnyŋ būl bölıgı resmi jariialanǧan künnen bastap 60 kün ötken soŋ, iaǧni 2026 jylǧy 25 tamyzda küşıne enedı.

Elektrsamokattar memlekettık tırkeuge jatpaityndyqtan, jeke menşık kölık qūraldarynyŋ ielerın anyqtau polisiia qyzmetkerlerı qūqyq būzuşyny tıkelei toqtatqan jaǧdaida ǧana mümkın bolady.

Sonymen qatar, 2026 jylǧy 1 şıldeden bastap jalǧa berıletın (kikşering) elektrsamokattarǧa qosymşa talaptar engızıledı. Atap aitqanda, olar tehnikalyq baiqaudan ötuge, mındettı saqtandyru räsımdeuge, paidalanuşynyŋ jürgızuşı kuälıgı boluyna, sondai-aq memlekettık tırkeu men nömırlık belgı aluǧa mındetteledı. Būl talaptar tek jalǧa berıletın elektrsamokattarǧa qatysty, al jeke menşık samokattar būrynǧydai memlekettık tırkeuden ötpeidı.

Eger elektrsamokat jürgızuşısı polisiia qyzmetkerınıŋ toqtau turaly zaŋdy talabyn oryndamasa, Äkımşılık qūqyq būzuşylyq turaly kodekstıŋ 613-babyna säikes, oǧan üş täulıkke deiın äkımşılık qamau jazasy qoldanyluy mümkın.